ملير: گلشن حديد ۾ واپارين پاران پوليس خلاف شٽر ڊائون هڙتال ۽ احتجاج

موبائيل شاپ تان ڦر ڪندر جوابدار گرفتار نھ ٿيڻ تي واپارين ۽ دڪاندارن احتجاج ڪيو

ملير (رپورٽ: عبدالرشيد مورجھريو) گلشن حديد ۾ موبائيل فون جي دڪان تي ٿيل ڦر جي واقعي کي چار ڏينهن گذرڻ باوجود جوابدارن جي گرفتاري نه ٿيڻ تي واپاري برادري پوليس جي ڪارڪردگي تي سخت تنقيد ڪندي شٽر ڊائون هڙتال ڪئي ۽ پرامن ريلي ڪڍي احتجاج ڪيو واپاري اڳواڻن چيو ته واقعي جون واضح سي سي ٽي وي فوٽيجز ۽ جوابدارن جون تصويرون سامهون اچڻ باوجود پوليس اڃا تائين ڪا اهم اڳڀرائي نه ڪري سگهي آهي، جنهن سبب واپارين ۾ سخت بيچيني پکڙيل آهي. هنن چيو ته واقعي کي چار ڏينهن گذري چڪا آهن، پر پوليس پاران ڪو واضح موقف سامهون نه آيو آهي، تنهن ڪري واپاري برادري احتجاج ۽ دڪانون بند رکڻ جو فيصلو ڪيو آهي ته جيئن متاثر واپاري کي انصاف ملي سگهي واپاري اڳواڻن وڌيڪ چيو ته جوابدارن جون تصويرون انتهائي واضح آهن ۽ واقعي جي وڊيو سڄي ملڪ ۾ وائرل ٿي چڪي آهي، تنهن هوندي به پوليس جوابدارن جو رڪارڊ ۽ ڊيٽا حاصل ڪرڻ ۾ ناڪام نظر اچي رهي آهي. جيڪڏهن اهڙن واضح ثبوتن باوجود ڪارروائي نه ٿئي ته واپارين جي جان ۽ مال جي تحفظ بابت وڏا سوال اڀرن ٿا. احتجاج دوران واپارين انصاف ڏيو، واپاري کي انصاف ڏيو جا نعرا هنيا ۽ سموري واپاري برادري کي شٽر ڊائون هڙتال ۾ شرڪت جي اپيل ڪئي. مظاهرين مطالبو ڪيو ته پوليس فوري طور جوابدارن کي گرفتار ڪري متاثر واپاري کي انصاف فراهم ڪري ۽ واپارين جي جان ۽ مال جي تحفظ کي يقيني بڻائي. واپاري برادري خبردار ڪيو آهي ته جيڪڏهن جوابدارن کي جلد گرفتار نه ڪيو ويو ته احتجاج جو دائرو وڌيڪ وسيع ڪيو ويندو.