رزاق آباد ۾ مونو ٽيڪنيڪل انسٽيٽيوٽ تي مبينا قبضي خلاف احتجاج

ڳوٺاڻن، شاگردن ۽ جساف شھيد بشير خان قريشي طرفان ريلي ڪڍي احتجاج ڪيو ويو

ملير (رپورٽ: عبدالرشيد مورجھريو) رزاق آباد ۾ هلندڙ مونو ٽيڪنيڪل انسٽيٽيوٽ تي ايس ايس يو جي مبينا حصيداري ۽ قبضي خلاف سول سوسائٽي ۽ جساف شھيد بشير خان قريشي طرفان زوردار احتجاجي ريلي ڪڍي وئي.هي احتجاجي ريلي جساف ضلعي ملير صدر ڪامريڊ وهاب گبول، اقبال ڪلمتي، شڪيل گبول ۽ ڪامران گبول جي اڳواڻي ۾ رزاق آباد جي مک چوڪ کان شروع ٿي، جيڪا نعريبازي ڪندي عوامي پريس ڪلب ملير تائين پهتي، جتي ڌرڻو هنيو ويو. احتجاج ڪندڙن جو چوڻ هو ته تعليمي ادارن تي مبينا قبضا ڪرڻ، شاگردن کي علم حاصل ڪرڻ کان محروم ڪرڻ ۽ عمارتون خالي ڪرائي بنيادي انساني حقن جي لتاڙ آهي. هنن الزام لڳايو ته مونو ٽيڪنيڪل انسٽيٽيوٽ جهڙي تعليمي اداري کي متاثر ڪري شاگردن جو مستقبل داءُ تي لڳايو پيو وڃي.مظاهرين سخت احتجاج ڪندي مطالبو ڪيو ته مونو ٽيڪنيڪل انسٽيٽيوٽ تان فوري طور تي ايس ايس يو جو مبينا قبضو ختم ڪيو وڃي ۽ تعليمي ادارو مڪمل طور تي شاگردن جي پڙهائي لاءِ کوليو وڃي.احتجاج دوران اڳواڻن خبردار ڪيو ته جيڪڏهن سندن مطالبا تسليم نه ڪيا ويا ته احتجاج جو دائرو وڌايو ويندو ۽ تحريڪ کي وڌيڪ تيز ڪيو ويندو