ملير جي اولڊ مظفر آباد ۾ افسوسناڪ واقعو، پاڻي جي ٽينڪي ۾ ٻڏي 7 ورهين جو ٻار فوت

ملير (رپورٽ: عبدالرشيد مورجھريو) اولڊ مظفر آباد واري علائقي ۾ هاشمي مسجد ڀرسان هڪ گهر اندر قائم پاڻي جي ٽينڪي ۾ ٻڏي هڪ معصوم ٻار فوت ٿي ويو، جنهن بعد علائقي ۾ سوڳ جي لهر ڇائنجي وئي، جڏهن ته گهر ڀاتي ڏک ۾ بيحال ٿي پيا۔اطلاعن موجب 7 ورهين جو ٻار گهر اندر راند ڪندي پاڻي جي ٽينڪي ڀرسان پهتو، جتي هو حادثاتي طور ٽينڪي ۾ ڪري پيو۔ ڪجهه دير تائين نظر نه اچڻ تي گهر ڀاتين ڳولا شروع ڪئي ته ٻار کي پاڻي جي ٽينڪي مان بيهوشي واري حالت ۾ ٻاهر ڪڍيو ويو۔ريسڪيو ذريعن موجب ٻار کي فوري طور ايمبولينس ذريعي جناح اسپتال منتقل ڪيو پئي ويو، جتي ڊاڪٽرن سندس فوت ٿيڻ جي تصديق ڪئي۔ فوتي ٻار جي سڃاڻپ عاصم ولد عارف طور ٿي آهي، جڏهن ته سندس عمر 7 سال ٻڌائي وڃي ٿي۔ واقعي کانپوءِ علائقي واسين گهرن ۾ قائم کليل پاڻي جي ٽينڪين کي ڍڪڻ ۽ حفاظتي اپائن کي يقيني بڻائڻ جي ضرورت تي زور ڏنو آهي ته جيئن اهڙن افسوسناڪ واقعن کان بچي سگهجي۔