ڪراچي ۾ قتل ڪيل ٿرواسي پورهيت وينهيون سميجو جي قاتلن جي گرفتاري لاءِ عمرڪوٽ ۾ احتجاج

عمرڪوٽ ( ڊ ، ر ) ڪراچي ۾ هڪ هفتو اڳ گوليون هڻي قتل ڪيل ٿرواسي پورهيت وينهيون سميجو جي قاتلن جي گرفتاري لاءِ پريس ڪلب عمرڪوٽ ٻاهران وارثن، شهرين ۽ سماجي ڪارڪنن پاران احتجاجي مظاهرو ڪيو ويو، جنهن دوران سخت نعريبازي ڪندي قاتلن کي فوري گرفتار ڪري متاثر خاندان کي انصاف فراهم ڪرڻ جو مطالبو ڪيو ويو، احتجاجي مظاهري جي اڳواڻي هوندو سميجو، خدابخش سميجو، بائيخان سميجو، عبدالحڪيم، علي محمد سميجو ۽ ٻين ڪئي، مظاهرين هٿن ۾ پلي ڪارڊ کڻي قاتلن خلاف سخت نعريبازي ڪندا رهيا، ان موقعي تي مظاهرين چيو ته ڪراچي جي وچ بازار ۾ پورهيت وينهيون سميجو کي بي رحمي سان قتل ڪيو ويو، جنهن واقعي جي جيتري مذمت ڪجي گهٽ آهي، هنن الزام لڳايو ته هر مهيني ڪراچي ۾ روزگار خاطر ويل ڪنهن نه ڪنهن ٿرواسي پورهيت کي گوليون هڻي قتل ڪيو وڃي ٿو، جيڪو ڪنهن منظم سازش کان گهٽ ناهي، مظاهرين وڌيڪَ چيو ته مقتول وينهيون سميجو پنهنجي گهر جو اڪيلو ڪمائيندڙ فرد هو، سندس بيگناهه قتل سان نه صرف خاندان مٿان ڏک جو جبل ٽٽي پيو آهي، پر سندس معصوم ٻچڙا پڻ يتيم ٿي ويا آهن، هنن چيو ته واقعي کي هڪ هفتو گذرڻ باوجود پوليس جوابدارن کي گرفتار ڪرڻ ۾ ناڪام وئي آهي، جنهن سبب وارثن ۽ علائقي واسين ۾ سخت بيچيني پکڙيل آهي، احتجاج ڪندڙن آءِ جي سنڌ پوليس، گهرو وزير سنڌ، وزيراعليٰ سنڌ ۽ چونڊيل نمائندن کان مطالبو ڪيو ته واقعي جو فوري نوٽيس وٺي قاتلن کي گرفتار ڪري متاثر خاندان سان انصاف ڪيو وڃي، ٻي صورت ۾ احتجاج جو دائرو سڄي سنڌ تائين وڌايو ويندو.