سنڌ اولمپڪ ايسوسي ئيشن پاران مس ثناءَ علي جي اعزاز ۾ شاندار تقريب منعقد

ڪراچي : سنڌ اولمپڪ ايسوسي ئيشن جي اهتمام هيٺ سنڌ اولمپڪ سيڪريٽريٽ آفيس، ڪي ايم سي اسپورٽس ڪمپليڪس ڪشمير روڊ ڪراچي ۾ مس ثناءَ علي جي اعزاز ۾ هڪ باوقار ۽ شاندار تقريب منعقد ڪئي وئي۔ تقريب ۾ راندين سان لاڳاپيل شخصيتن، آفيسرن، ميڊيا نمائندن ۽ مختلف گيمز ايسوسي ائيشنن جي عهديدارن شرڪت ڪئي۔ مس ثناءَ علي کي اهو منفرد اعزاز حاصل ٿيو ته هن ڇهين ايشيئن بيچ گيمز، سائنہ چين ۾ پاڪستان جي نمائندگي ڪئي ۽ پاڪستان جي پهرين ليڊي شيف ڊي مشن بڻجڻ جو اعزاز پنهنجي نالي ڪيو۔ اهو اعزاز پاڪستان اولمپڪ ايسوسي ئيشن جي صدر عارف سعيد ۽ جنرل سيڪريٽري خالد محمود پاران سنڌ کي ڏنو ويو۔ تقريب کي خطاب ڪندي سنڌ اولمپڪ ايسوسيئيشن جي جنرل سيڪريٽري احمد علي راجپوت مس ثناءَ علي کي مبارڪباد پيش ڪندي چيو ته هي سنڌ ۽ پاڪستان لاءِ هڪ تاريخي لمحو آهي۔ هن موقعي تي سنڌ اولمپڪ ايسوسيئيشن سان لاڳاپيل مختلف گيمز جي سيڪريٽرين، صدرن ۽ آفيس اسٽاف پڻ مس ثناءَ علي کي ڀرپور ڀيٽا پيش ڪئي۔ مس ثناءَ علي پنهنجي خطاب ۾ الله تعاليٰ جو شڪر ادا ڪندي چيو ته کيس فخر آهي ته هي اعزاز پهريون ڀيرو سنڌ کي حاصل ٿيو آهي ۽ هن ڪاميابي ۾ سڀني آفيس بيئررن ۽ راندين سان لاڳاپيل ماڻهن جون ڪوششون شامل آهن۔ شاندار تقريب جي پڄاڻي تي 35هين نيشنل گيمز جي آرگنائيزرن، آفيس بيئررن ۽ ميڊيا پرسنز ۾ اعزازي شيلڊون ورهايون ويون۔ ان موقعي تي انجنيئر محفوظ الحق، جميل احمد، نديم خان، ميڊيا مئنيجر محمد قمر خان ۽ ميڊيا ڪوآرڊينيٽر ڪاشف احمد فاروقي کي اعزازي شيلڊن سان نوازيو ويو آهي...