ٺٽي ۾ صحافت جي آزاديءَ جي عالمي ڏينهن جي حوالي سان تقريب منعقد

بلاول سمون، محمد عمر سرائي، عبيد جماري، مختيار جان چانڊيو، عدنان سمون ۽ ٻيا تقريب ۾ شريڪ

ٺٽو(محمد شفيق ڀٽي)صحافت جي آزاديءَ جي عالمي ڏينهن جي موقعي تي سماجي تنظيم پيغام جي سهڪار سان عوامي پريس ڪلب ٺٽو پاران هڪ تقريب منعقد ڪئي وئي، جنهن ۾ ايڇ يو جي يونٽ ٺٽو جي صدر شبير ڀٽي، عوامي پريس ڪلب ٺٽو جي روحِ روان بلاول سمون سميت محمد عمر سرائي، عبيد جماري، مختيار جان چانڊيو، عدنان سمون، ڪامريڊ زاهد جوکيو، راجا شريف ميمڻ، زاهد امير جوکيو، ثناءُ الله سمون، مجتبيٰ بڪيرو، حفيظ چنڊ, مڪيش ديو ۽ ٻين شرڪت ڪئي۔ تقريب کي خطاب ڪندي عوامي پريس ڪلب ٺٽو جي صدر بلاول سمون چيو ته مقامي کان وٺي عالمي سطح تائين صحافين وڏيون قربانيون ڏنيون آهن۔ صحافي هميشه سماج ۾ لڪل سچ کي سامهون آڻي حقيقتون اجاگر ڪندا رهيا آهن، جنهن سبب ڪيترائي مفاد پرست ۽ ڦورو ٽولا آزاد صحافت خلاف سازشون ڪندا رهن ٿا۔ هن چيو ته ڪيترن ئي صحافين سچ لکڻ جي ڏوهه ۾ پنهنجون حياتيون به قربان ڪيون آهن، جيڪو صحافت جي تاريخ جو روشن باب آهي۔ هن وڌيڪ چيو ته سماج جا ڪجهه عنصر صحافين خلاف منفي پروپيگنڊا ۽ ڪردار ڪشي ۾ مصروف آهن، جڏهن ته حقيقت ۾ اهي ئي ماڻهو سماج جا ناسور آهن، جيڪي منشيات سميت مختلف غيرقانوني سرگرمين ۾ ملوث آهن ۽ ساڳئي وقت سچ لکندڙ صحافين خلاف مهم هلائين ٿا۔ بلاول سمون چيو ته صحافتي برادري ۾ هڪ ٻيو منفي رجحان به جنم وٺي رهيو آهي، جنهن تحت ڪجهه فرد ٻين صحافين کي “عطائي” قرار ڏئي ويڇا پيدا ڪري رهيا آهن، جيڪو انتهائي افسوسناڪ عمل آهي۔ هن ضلعي جي صحافين کي اپيل ڪئي ته ذاتي اختلاف وساري اتحاد ۽ ٻڌي جو مظاهرو ڪن ته جيئن سچ جي صحافت وڌيڪ مضبوط ٿي سگهي ۽ سماج ۾ مثبت تبديلي اچي سگهي۔ ان موقعي تي ايڇ يو جي يونٽ ٺٽو جي صدر شبير ڀٽي چيو ته صحافت بنيادي طور تي هڪ پيغمبري پيشو آهي، جنهن ۾ صحافي بنا ڪنهن ذاتي مفاد جي پنهنجي جان جوکي ۾ وجهي سماج جي ڪمزور طبقن جو آواز بڻجن ٿا۔ اهڙن صحافين کي خراج تحسين پيش ڪيو وڃي ٿو۔ تقريب کي محمد عمر سرائي، عبيد جماري، ممتاز سميجو ۽ ٻين پڻ خطاب ڪيو، جڏهن ته آخر ۾ بهترين ڪارڪردگي جو مظاهرو ڪندڙ صحافين کي سماجي تنظيم پيغام پاران مڃتا سرٽيفڪيٽ پڻ ڏنا ويا۔