ڪنري ٽائون چيئرمين شڪيل باجوا جي صدارت هيٺ اجلاس

اجلاس کي يوٿ انگيجمنٽ ڪاميٽي جي مقصدن بابت تفصيلي بريفنگ

عمرڪوٽ (رپورٽ:ڪانجي مل رکيسر) ٽائون ڪاميٽي ڪنري ۾ يوٿ انگيجمنٽ ڪاميٽي جي حوالي سان ھڪ اھم اجلاس چيئرمين ٽائون ڪاميٽي ڪنري شڪيل احمد باجوا جي صدارت هيٺ منعقد ٿيو، اجلاس ۾ ڪاميٽي جا سڀ نامزد ميمبر، اي ڊي ايل جي لوڪل گورنمينٽ عمرڪوٽ ھريش چندر کتري، ڊسٽرڪٽ اسپورٽس آفيسر عمرڪوٽ پرويز مري، اطلاعات کاتي جا عملدار محبت سومرو ۽ مينهل ڀٽي، ٽائون آفيسر ڪنري جھانزيب آرائين، لاڳاپيل کاتن جا آفيسر ۽ ٻيا اسٽيڪ ھولڊرز شريڪ ٿيا، ان موقعي تي ڊپٽي ڊائريڪٽر لوڪل گورنمينٽ ھريش چندر ۽ ڊسٽرڪٽ اسپورٽس آفيسر پرويز مري اجلاس کي يوٿ انگيجمنٽ ڪاميٽي جي مقصدن بابت تفصيلي بريفنگ ڏني، ان موقعي تي چيئرمين ٽائون ڪاميٽي ڪنري شڪيل احمد باجوا چيو ته نوجوانن کي مثبت سرگرمين ڏانھن راغب ڪرڻ وقت جي اهم ضرورت آهي ۽ هن ڪاميٽي جو قيام ان سلسلي جي هڪ اهم ڪڙي آهي، اجلاس دوران ڪاميٽي ميمبرن پنهنجا خيال ۽ تجويزون پيش ڪيون ۽ نوجوانن لاءِ مثبت سرگرمين جي فروغ تي زور ڏنو ويو، ان موقعي تي اهم فيصلا ڪيا ويا، جن ۾ نوجوانن جي رجسٽريشن ڪري هڪ جامع ڊيٽا بيس تيار ڪرڻ جو فيصلو ڪيو ويو ته جيئن نوجوانن جي صلاحيتن ۽ دلچسپين مطابق کين موقعا فراهم ڪري سگهجن، اجلاس ۾ مقامي سطح تي راندين جا مقابلا، ثقافتي پروگرام ۽ ادبي تقريبون منعقد ڪرائڻ جي منظوري پڻ ڏني وئي، اجلاس جي پڄاڻي تي چيئرمين شڪيل احمد باجوا سڀني شرڪت ڪندڙن جو ٿورو مڃيو ۽ ان عزم جو اظهار ڪيو ته يوٿ انگيجمنٽ ڪاميٽي نوجوانن لاءِ هڪ مؤثر پليٽفارم ثابت ٿيندي، هن سڀني ميمبرن کي هدايت ڪئي ته هو پنهنجي پنهنجي شعبي ۾ فعال ڪردار ادا ڪن ته جيئن انهن فيصلن تي مؤثر نموني عملدرآمد کي يقيني بڻائي سگهجي۔