نوشهروفيروز ۾ اي ڊي سي (ون) محمد مستقيم قريشي جي صدارت هيٺ اجلاس

اجلاس ۾ مون سون جي امڪاني برساتن ۽ ٻوڏ جي صورتحال کي منهن ڏيڻ جي حوالي سان غور ويچار

نوشهروفيروز (ڊ ر) ايڊيشنل ڊپٽي ڪمشنر (ون) نوشهروفيروز محمد مستقيم قريشي جي صدارت هيٺ هڪ اهم اڳواٽ انتظامي اجلاس منعقد ٿيو، جنهن ۾ 2026 جي مون سون جي متوقع برساتن ۽ ممڪن ٻوڏ جي صورتحال کي منهن ڏيڻ لاءِ مقامي حڪومتي ادارن، صحت، پوليس، زراعت، آبپاشي، اسڪارپ، تعليم، لائيو اسٽاڪ ۽ ٻين لاڳاپيل کاتن جي آفيسرن شرڪت ڪئي ته جيئن برسات دوران هنگامي صورتحال کي بروقت منهن ڏئي سگهجي. ايڊيشنل ڊپٽي ڪمشنر محمد مستقيم قريشي ميونسپل ڪميٽين ۽ ٽائون آفيسرن کي سختي سان هدايت ڪئي ته ضلعي جي سڀني ننڍن ۽ وڏن برساتي نالن ۽ سيوريج لائينن جي صفائي جو ڪم هنگامي بنيادن تي مڪمل ڪيو وڃي ته جيئن برساتي پاڻي جي فوري نيڪال ممڪن ٿي سگهي. هن آبپاشي کاتي جي آفيسرن کي هدايت ڪئي ته واهن، دريائن ۽ حفاظتي بندن تي سخت نظر رکن ۽ ڪنهن به ممڪن ٽٽڻ کي روڪڻ لاءِ ريتي جون ٿيلهيون ۽ ضروري مشينري اڳواٽ تيار رکن. هن صحت کاتي کي الرٽ رهڻ جو حڪم ڏنو ۽ چيو ته برسات جي موسم ۾ پکڙجندڙ بيمارين لاءِ دوائون، نانگ جي چڪ جي خلاف ويڪسين ۽ پيرا ميڊيڪل اسٽاف کي ضلعي جي سڀني سرڪاري اسپتالن ۽ بنيادي صحت مرڪزن (BHUs) ۾ 24 ڪلاڪ يقيني بڻايو وڃي. هن ڊپٽي ڪمشنر آفيس سميت سڀني تعلقي هيڊ ڪوارٽرز ۾ مون سون ڪنٽرول روم قائم ڪرڻ جو حڪم ڏنو ته جيئن ڪنهن به هنگامي شڪايت تي فوري ڪارروائي ڪري سگهجي. ايڊيشنل ڊپٽي ڪمشنر چيو ته برسات ۽ ممڪن ٻوڏ جي چئلينجن کي منهن ڏيڻ لاءِ سڀني کاتن کي الرٽ رهڻو پوندو ۽ ڪنهن به قسم جي غفلت يا لاپرواهي برداشت نه ڪئي ويندي ته جيئن شهري محفوظ رهي سگهن. هن لائيو اسٽاڪ کاتي جي آفيسرن کي هدايت ڪئي ته ننڍن ۽ وڏن جانورن جي ويڪسينيشن لاءِ انتظام مڪمل ڪن ۽ امڪاني برسات ۽ ٻوڏ جي صورتحال لاءِ پنهنجو هنگامي پلان تيار ڪن. هن اسڪارپ آبپاشي کاتي جي آفيسرن کي هدايت ڪئي ته اهي پنهنجا پمپنگ اسٽيشن فعال رکن ۽ برساتي پاڻي جي نيڪال لاءِ متبادل انتظام مڪمل ڪن. هن سماجي ڀلائي کاتي جي ايڊيشنل ڊائريڪٽر نعيم احمد ميمڻ کي هدايت ڪئي ته ضلعي ۾ ڪم ڪندڙ سماجي ڀلائي تنظيمن سان رابطي ۾ رهن ۽ انهن جي افرادي قوت ۽ ٻي مشينري جي فهرست تيار رکن ته جيئن ضرورت جي وقت انهن جي مدد حاصل ڪري سگهجي.