ٺارو شاهه جي ڳوٺ ميئو چانڊيو واسي زال مڙس جو بااثرن خلاف احتجاج

نوشهروفيروز (ڊ ر)نوشهروفيروز ڀرسان ٺاروشاهه جي ويجهو ڳوٺ ميئو چانڊيو جي رهواسي شادي شده جوڙي بختاور سولنگي ۽ سندس مڙس ارسلان چانڊيو پريس ڪلب آڏو احتجاج ڪندي سسرال ڌر، پوليس ۽ بااثر ماڻهن خلاف ڪارروائي جو مطالبو ڪيو. ان موقعي تي بختاور سولنگي ۽ ارسلان چانڊيو ميڊيا سان ڳالهائيندي ٻڌايو ته هنن پنج سال اڳ ٻنهي خاندانن جي رضامندي سان شادي ڪئي هئي. ارسلان چانڊيو الزام هنيو ته چار مهينا اڳ سندس سس جي وفات کان پوءِ سندس سهرو مير ماڇي، سندس پٽ بلاول ۽ ٻين جوابدارن سندن گهر تي زبردستي قبضي جون ڪوششون شروع ڪري ڇڏيون. هن وڌيڪ الزام هنيو ته ٻه ڏينهن اڳ پوليس جو اي ايس آءِ شوڪت علي ٻين پوليس اهلڪارن سان گڏ سندن گهر ۾ زبردستي داخل ٿيو ۽ الماري مان 80 هزار رپيا روڪ رقم ۽ سون جا زيور کڻي ويو. احتجاج ڪندڙن جو چوڻ هو ته مير ماڇي هڪ پلاٽ پڻ وڪرو ڪري ڇڏيو آهي، ۽ جڏهن هنن پنهنجي زال جي قانوني حصي جو مطالبو ڪيو ته کين قتل ڪرڻ ۽ ڪوڙن ڪيسن ۾ ڦاسائڻ جون ڌمڪيون ڏنيون پيون وڃن. هنن اعليٰ اختيارين کان مطالبو ڪيو ته کين مبينا طور ورتل 80 هزار رپيا ۽ سون جا زيور واپس ڪرايا وڃن، سندن گهر تان قبضو ختم ڪرايو وڃي، پلاٽ ۾ سندن قانوني حصو ڏياريو وڃي ۽ کين تحفظ فراهم ڪيو وڃي، ٻي صورت ۾ هو تاحيات بک هڙتال ڪرڻ تي مجبور ٿيندا.