گلشن حديد ۾ ليڊي هيلٿ ورڪرز جو سپروائيزر خلاف ڪم ڇڏ هڙتال ۽ احتجاج

سخت گرميءَ ۽ ڏکين حالتن باوجود ايمانداري سان پنهنجون ذميواريون ادا ڪنديون آهن: ايل ايڇ وي

ملير (رپورٽ: عبدالرشيد مورجھريو) گلشن حديد ۾ ليڊي هيلٿ ورڪرز سپروائيزر خلاف ڪم ڇڏ هڙتال ڪندي زيب الندس ٽرڪ جي اڳواڻي ۾ احتجاجي مظاهرو ڪيو احتجاج ڪندڙن سپروائيز کي فوري طور هٽائڻ جو مطالبو ڪندي چيو ته هو سخت گرميءَ ۽ ڏکين حالتن باوجود ايمانداري سان پنهنجون ذميواريون نڀائين ٿيون پر کين مسلسل ذهني اذيت ۽ هراسان ڪرڻ جو نشانو بڻايو پيو وڃي احتجاج ڪندڙ ليڊي هيلٿ ورڪرز جو چوڻ هو ته بنا ڪنهن جواز جي نوڪري تان برطرف ڪرڻ جون ڌمڪيون ڏنيون وڃن ٿيون، جڏهن ته سندن جائز موڪلون پڻ بند ڪيون ويون آهن، جنهن سبب هو ذهني دٻاءُ ۽ پريشاني جو شڪار آهن. هنن حڪومت ۽ لاڳاپيل صحت کاتي جي اعليٰ اختيارين کان مطالبو ڪيو ته سپروائيزر خلاف شڪايتن جو نوٽيس وٺي کيس فوري طور هٽايو وڃي ۽ ليڊي هيلٿ ورڪرز سان ٿيندڙ ناانصافين جو ازالو ڪندي کين محفوظ ۽ باوقار ڪم ڪندڙ ماحول فراهم ڪيو وڃي احتجاج ڪندڙن خبردار ڪيو ته جيڪڏهن سندن جائز مطالبا تسليم نه ڪيا ويا ته احتجاج جو دائرو وڌيڪ وسيع ڪيو ويندو، جنهن جي سموري ذميواري لاڳاپيل اختيارين تي هوندي.