ملير: گلشن حديد يا حسين عه جي صدائن سان گونجي اٿيو

گلشن حديد، ملير سٽي، گڏاپ، شاهه لطيف، ابراهيم حيدري، گهگهر ڦاٽڻ ۽ بين علائقن ۾ ماتمي جلوس برآمد

ملير (رپورٽ: عبدالرشيد مورجھريو) ڪراچي جي مختلف علائقن سميت گلشنِ حديد، ملير سٽي، گڏاپ ٽائون، شاهه لطيف ٽائون، ابراهيم حيدري، گھگھر ڦاٽڪ، پپري، رزاق آباد، ميمن ڳوٺ ۽ ڀرپاسي وارن علائقن ۾ 7 محرم الحرام جي موقعي تي ماتمي جلوسن، مجلسن، نياز ۽ سبيلن جو سلسلو وڏي عقيدت ۽ احترام سان جاري رهيو. عزادارن وڏي انگ ۾ شرڪت ڪري حضرت امام حسينؑ ۽ شهيدنِ ڪربلا کي ڀرپور ڀيٽا پيش ڪئي گلشنِ حديد مان نڪتل 7 محرم الحرام جو مرڪزي ماتمي جلوس مقرر رستن تان گذرندي پنهنجي منزل ڏانهن روان دوان رهيو. جلوس ۾ شامل عزادار “يا حسينؑ”، “يا عباسؑ” ۽ “لبيڪ يا حسينؑ” جا نعرا هڻندي شهيدنِ ڪربلا جي عظيم قربانين کي ياد ڪندا رهيا. مختلف امام بارگاهن ۽ عزاخانن ۾ منعقد مجلسن دوران عالمن ۽ ذاڪرن واقعي ڪربلا، حق ۽ باطل جي معرڪي ۽ امام حسينؑ جي لازوال قربانين تي تفصيلي روشني وڌي ملير سٽي، گڏاپ، شاهه لطيف ٽائون، ابراهيم حيدري، گھگھر ڦاٽڪ، پپري، رزاق آباد ۽ ميمن ڳوٺ سميت مختلف علائقن ۾ مقامي انجمنن، تنظيمن ۽ مخير حضرات طرفان عزادارن لاءِ ٿڌي پاڻي، شربت، کير ۽ ٻين مشروبات جون سبيلون قائم ڪيون ويون، جڏهن ته نياز ۽ لنگر جو به وسيع انتظام ڪيو ويو. نوجوان رضاڪارن عزادارن جي خدمت ۽ جلوسن جي نظم ضبط برقرار رکڻ ۾ سرگرم ڪردار ادا ڪيو سيڪيورٽي جي حوالي سان پوليس، رينجرز ۽ ٻين قانون لاڳو ڪندڙ ادارن طرفان سخت حفاظتي انتظام ڪيا ويا. جلوسن جي رستن تي سيڪيورٽي اهلڪار مقرر رهيا، جڏهن ته داخلا ۽ نڪرڻ وارن هنڌن تي به نگراني جو خاص بندوبست ڪيو ويو. ٽريفڪ پوليس طرفان متبادل رستن جو انتظام ڪري شهري آمدرفت کي برقرار رکڻ جي ڪوشش ڪئي وئي عزادارن جو چوڻ هو ته واقعو ڪربلا صرف هڪ تاريخي واقعو نه پر ظلم، جبر ۽ ناانصافي خلاف حق جي جدوجهد جو دائمي پيغام آهي. هنن چيو ته حضرت امام حسينؑ ۽ سندن ساٿين جون قربانيون رهندي دنيا تائين انسانيت، سچائي ۽ انصاف لاءِ مشعلِ راهه بڻيل رهنديون. 7 محرم الحرام جا ماتمي جلوس، مجلسون، نياز ۽ سبيلون رات دير تائين جاري رهيون، جڏهن ته ايندڙ ڏينهن ۾ عزاداري جون سرگرميون وڌيڪ تيز ٿيڻ جو امڪان آهي. سڄي علائقي ۾ محرم الحرام جي حوالي سان عقيدت، احترام ۽ مذهبي جوش و جذبي جي فضا برقرار رهي.