عمرڪوٽ ۾ پوليس کاتي ۾ ڀرتي لاءِ ٽيسٽ پاس ڪندڙ اميدوارن جو ڌرڻو

اميدوارن جناح پارڪ کان پريس ڪلب تائين ريلي ڪڍي ڌرڻو هنيو، ٽريفڪ معطل

عمرڪوٽ (ڪانجي مل رکيسر) عمرڪوٽ ٿرپارڪر SPD01 پوليس ڪانسٽيبل جي نوڪري لاءِ فزيڪل ٽيسٽ، لکت واري امتحان ۽ انٽرويو وارو مرحلو ڪاميابي سان مڪمل ڪندڙ اميدوارن کي آفر آرڊر جاري نه ٿيڻ خلاف الله والا چوڪ تي احتجاجي مظاهرو ڪري ڌرڻو هنيو ويو، جنهن سبب روڊ بلاڪ ٿيڻ ڪري ٽريفڪ جي رواني متاثر ٿي، احتجاج ڪندڙ نوجوانن رجب منڱريو، غلام مرتضيٰ پلي، محمد آدم مهر، وقاص ڪنڀر، راحیل طاهر آرائين، جمال چوپاڻ، مرتضيٰ منڱريو ۽ ٻين جي اڳواڻي ۾ هٿن ۾ بينر ۽ پلي ڪارڊ کڻي مطالبو ڪيو ته ڪامياب اميدوارن کي فوري طور آفر آرڊر جاري ڪيا وڃن، مظاهرين جو چوڻ هو ته هڪ سال اڳ پوليس ڪانسٽيبل جي ڀرتي لاءِ لکت واري ۽ جسماني ٽيسٽ پاس ڪئي، جڏهن ته انٽرويو وارو مرحلو پڻ مڪمل ڪيو ويو، پر ان باوجود اڃان تائين آفر آرڊر جاري نه ڪيا ويا آهن، جنهن سبب نوجوان سخت پريشاني ۽ مايوسي جو شڪار بڻجي ويا آهن، هنن چيو ته ڀرتي واري عمل ۾ غير ضروري دير سبب ڪيترائي اميدوار ذهني دٻاءَ ۽ معاشي مسئلن کي منهن ڏئي رهيا آهن، حڪومت سنڌ، وزير قانون ۽ پوليس اختيارين کان مطالبو ڪيو ويو ته عمرڪوٽ ۽ ٿرپارڪر جي ڪامياب اميدوارن کي جلد کان جلد آفر آرڊر جاري ڪري بيچيني ختم ڪئي وڃي، مظاهرين خبردار ڪيو ته جيڪڏهن سندن مطالبا تسليم نه ڪيا ويا ته احتجاج جو دائرو وسيع ڪيو ويندو، احتجاج دوران الله والا چوڪ بند ٿيڻ سبب ڪجهه وقت لاءِ ٽريفڪ معطل رهي.