گهگهر لڳ سسئي پل تي حادثي ۾ 7 پورهيت زخمي، هڪ جي حالت ڳڻتي جوڳي

مزدورن سان ڀريل رڪشا ۽ ٽرالر ۾ خوفناڪ ٽڪر جي نتيجي ۾ 7 پورهيت سخت زخمي ٿي پيا

ملير (رپورٽ: عبدالرشيد مورجھريو) ملير جي علائقي گهگهر لڳ سسئي پل وٽ مزدورن سان ڀريل رڪشي ۽ ٽرالر جي وچ ۾ خوفناڪ حادثو پيش آيو، جنهن جي نتيجي ۾ 7 مزدور زخمي ٿي پيا، جڏهن ته هڪ زخمي جي حالت ڳڻتي جوڳي هجڻ سبب کيس جناح اسپتال ڪراچي منتقل ڪيو ويو، تفصيل موجب آصف رائيس مل ۾ مزدوري لاءِ ويندڙ لڳ ڀڳ 10 مزدور هڪ رڪشي ۾ سوار هئا ته سسئي پل وٽ موڙ تي سامهون ايندڙ ٽرالر سان سندن رڪشي جو ٽڪر ٿي پيو، حادثي جي نتيجي ۾ غلام علي، نديم، مير حسن، سليم چانڊيو، امجد چانڊيو، منٺار ريٻاري، سهيل ٻٻر ۽ شمشير ڪوري زخمي ٿي پيا، مقامي ماڻهن فوري طور امدادي ڪارروائي ڪندي زخمين کي پنهنجي مدد پاڻ تحت ويجهي نجي اسپتال منتقل ڪيو، جتي کين طبي امداد فراهم ڪئي وئي، ڊاڪٽرن موجب زخمي شمشير ڪوري جي حالت ڳڻتي جوڳي هجڻ سبب کيس وڌيڪ علاج لاءِ جناح اسپتال ڪراچي منتقل ڪيو ويو، حادثي بابت زخمين ۽ رڪشي ڊرائيور ٻڌايو ته سسئي پل وٽ موڙ تي هڪ ٽرالر اوچتو رانگ سائيڊ تي اچي ويو، جنهن سبب رڪشي سان ٽڪر ٿيو ۽ حادثو پيش آيو. هنن لاڳاپيل اختيارين کان واقعي جي جاچ ۽ ذميوارن خلاف ڪارروائي جو مطالبو ڪيو، واقعي جو اطلاع ملندي ئي اسٽيل ٽائون پوليس موقعي تي پهچي وئي ۽ حادثي ۾ ملوث ٽرالر کي پنهنجي تحويل ۾ وٺي ڇڏيو. پوليس موجب واقعي بابت وڌيڪ جاچ جاري آهي ۽ حقيقتون سامهون اچڻ کان پوءِ قانون موجب ڪارروائي ڪئي ويندي.