نوشهروفيروز ۾ هڪ کان 4 گريڊ جي خالي پوسٽن لاءِ انٽرويوز جاري

نوشهروفيروز (ڊ ر)روينيو کاتي ۾ روزگار ۽ ميرٽ کي يقيني بڻائڻ لاءِ، ڊپٽي ڪمشنر نوشهروفيروز محمد ارسلان سليم جي ھدايت تي اڄ ٽئين ڏينهن ڊپٽي ڪمشنر آفيس نوشهروفيروز ۾ گريڊ 1 کان 4 تائين مختلف خالي پوسٽن تي ڀرتي لاءِ اميدوارن جا انٽرويو ورتا ويا. مورو تعلقي مان 332 اميدوارن اڄ انٽرويو ۾ حصو ورتو. انهن پوسٽن ۾ نائب قاصد، چوڪيدار، ڪوٽڙ، ڊرائيو ۽ گريڊ 1 کان 4 جون ٻيون ٽيڪنيڪل ۽ نان ٽيڪنيڪل پوسٽون شامل آهن. سليڪيشن ڪميٽي جي ميمبرن ايڊيشنل ڊپٽي ڪمشنر ون محمد مستقيم قريشي، ايس اينڊ جي ڊي سيڪشن آفيسر حاڪم علي انڙ، سيد جيئل شاهه، صفير الحسنين لاڙڪ ۽ ٻين چيو ته صوبائي حڪومت جي هدايتن موجب، سڀئي ڀرتيون خالصتاً ميرٽ، شفافيت ۽ قابليت جي بنياد تي ڪيون پيون وڃن. مستحق ۽ اهل اميدوارن کي ڪنهن به قسم جي سفارش يا دٻاءُ کي نظر ۾ رکڻ کانسواءِ انهن جو حق ڏنو ويندو ته جيئن سرڪاري کاتن جي ڪارڪردگي کي وڌيڪ بهتر بڻائي سگهجي.