باقراڻي ڀرسان ٻارڙن جي ڳالهه تان اوطاق تي مبينا حملو، هڪ ڄڻو قتل، 6 زخمي

باقراڻي: يونيورسٽي ٿاڻي جي حد ڳوٺ ابو صمد تنيو ۾ ٻارن جي ڳالهه تان مبينا حملو ڪيو ويو

باقراڻي : باقراڻي لڳ يونيورسٽي ٿاڻي جي حد ڳوٺ ابوصمد تنيو ۾ معمولي ڳالهه تان جوڻيجا ، تنيا ۽ بروهي برادري جي ڌرين وچ ۾ جهيڙو ٿي پيو، هڪ ٻئي مٿان ڏنڊن، لٺن جو وسڪارو لائي ڏنو، فائرنگ ، جنهن دوران تنيا ڌر جو 50 ورهين جو عبدالفتاح تنيو پٽ خير محمد تنيو، نوجوان عاقب پٽ مختيار تنيو گولي لڳڻ سبب سخت زخمي ٿي پيا ، جڏهن ته مختيار تنيو، سرفراز تنيو، محمد يوسف تنيو، فيض محمد تنيو، ڪاشف تنيو ڏنڊا ۽ ڪهاڙيون لڳڻ سبب سخت زخمي ٿي پيا، اھڙي اطلاع ملڻ تي حد جي پوليس واقعي واري هنڌ پهچي واقعي بابت تفصيل معلوم ڪيا جنهن بعد زخمين کي ڳڻتي جوڳي حالت م علاج لاءِ لاڙڪاڻو ٽراما سينٽر لاڙڪاڻي کڻائي ويا، جتي عبدالفتاح تنيو زخمن جا سور نه سهندي فوت ٿي ويو، ڊاڪٽرن پاران فوت ٿيڻ جي تصديق بعد مقتول جو لاش پوسٽ مارٽم بعد وارثن حوالي ڪيو ويو، لاش گهر پهچڻ تي تي قهرام مچي ويو، سندس گهر واري سميت ٻيون وارث عورت ۽ معصوم ٻارڙا لاش کي چنبڙي اڀ ڏاريندڙ دانھون ڪري قاتلن کي پٽون ۽ پاراتا ڏنا، ان سلسلي ۾ مقتول عبدالفتاح تنيو جي وارثن ميڊيا سان ڳالهائيندي چيو ته ٻارڙن جي معمولي ڳالهه تان جوڻيجا ۽ بروهي برادري جي ڏنڊا بردار ۽ هٿياربند ماڻهن اسان جي اوطاق تي حملو ڪري اوطاق تي ويٺل ماڻهن جي مٿان فائرنگ ڪري ڏني جنهن جي نتيجي ۾ عبدالفتاح تنيو ۽ نوجوان عاقب تنيو گولي لڳڻ سبب زخمي ٿي پيا هئا جڏهن ته ٻين کي ڏنڊا ۽ ڪهاڙيون هڻي سخت زخمي ڪري ڇڏيو، جنهن بعد زخمي عبدالفتاح تنيو زخمن جا سور نه سهندي فوت ٿي ويو، هنن چيو ته ظالمن ظلم ڪيو آهي، هنن ڊي آئي جي لاڙڪاڻو، ايس ايس پي لاڙڪاڻو ۽ ٻين کان مطالبو ڪيو ته بنا دير قاتلن کي گرفتار ڪري اسان سان انصاف ڪيو وڃي، هوڏانهن ان سلسلي ۾ رابطو ڪرڻ تي ايس ايڇ او يونيورسٽي گل حسن بروهي ٻڌايو ته ڳوٺ ابو صمد تنيو ۾ معمولي ڳالهه تان تنيا، جوڻيجا ۽ بروهي برادري جي ڌرين وچ ۾ جهيڙو ٿي جنهن ۾ گولي لڳڻ سبب هڪ ڄڻو عبدالفتاح تنيو فوت ٿي ويو، جڏهن ته زخمي ٿي پيا آهن، اھڙي اطلاع ملڻ تي پوليس واقعي واري هنڌ پهچي زخمين کي لاڙڪاڻي اسپتال منتقل ڪيو، ڳوٺ ۾ وڌيڪ خونريزي کي روڪڻ لاءِ پوسٽ پڪٽ قائم ڪري ڇڏي آهي، ايس ايڇ او وڌيڪ ٻڌايو ته جوابدارن جي گرفتاري لاءِ ڇاپا هنيا ويا پر اڳواٽ ئي گهر خالي ڪري فرار ٿي ويا آهن.