ملير: جساف پاران مونو ٽيڪنيڪل ڪاليج رزاق آباد مبينا قبضي خلاف احتجاج جو اعلان

تعليمي ادارن تان قبضا ختم ڪرائي سنڌي شاگردن لاءِ تعليم جا دروازا کوليا وڃن: جساف اڳواڻ

ملير (رپورٽ: عبدالرشيد مورجھريو) جيئي سنڌ اسٽوڊنٽس فيڊريشن (جساف) شهيد بشير خان جي مرڪزي اڳواڻ عزادار چانڊيو، ضلعي ملير جي صدر وهاب گبول ۽ ثاقب سنڌي پريس ڪانفرنس ڪندي چيو آهي ته دنيا جي ڪنهن به خطي جي تعليمي ادارن اندر رهائش جي اجازت نه هوندي آهي، پر افسوس سان سنڌ جي تعليمي ادارن اندر مداخلت سبب شاگردن جي علمي ۽ فڪري واڌ ويجهه متاثر ٿي رهي آهي.هنن الزام هنيو ته مونو ٽيڪنيڪل ڪاليج رزاق آباد ۾ ايس ايس يو پوليس اهلڪارن کي رهائش فراهم ڪري سنڌ جي شاگردن لاءِ تعليم جا دروازا بند ڪيا ويا آهن. هنن چيو ته ڪاليج جو مقصد ٽيڪنيڪل ماهر، انجنيئر ۽ سائنسدان پيدا ڪرڻ آهي، پر اتي تعليمي سرگرمين بدران فورسز جي موجودگي سان ادارو پنهنجي بنيادي مقصد کان پري ٿي ويو آهي، جيڪو سنڌ جي مستقبل لاءِ ڳڻتي جوڳي صورتحال آهي. جساف اڳواڻن چيو ته مونو ٽيڪنيڪل ڪاليج جي ڪلاس رومن ۾ ايس ايس يو جي عملي کي رهائش ڏني وئي آهي، هنن مطالبو ڪيو ته مونو ٽيڪنيڪل ڪاليج تي قبضي هيٺ ويٺل ايس ايس يو اهلڪارن کي فوري طور بيدخل ڪري سنڌي شاگردن لاءِ تعليمي سرگرميون بحال ڪيون وڃن. ٻي صورت ۾ جساف شهيد بشير خان پاران احتجاجي تحريڪ جو دائرو وڌيڪ وسيع ڪيو ويندو.پريس ڪانفرنس ۾ اعلان ڪيو ويو ته جساف شهيد بشير خان ضلعي ملير جي سڏ تي 4 جون 2026ع تي مونو ٽيڪنيڪل ڪاليج رزاق آباد جي مک گيٽ آڏو احتجاجي مظاهرو ڪيو ويندو، جيڪو تحريڪ جو پهريون مرحلو هوندو.