محرابپور ۾ 3ٻارڙن جي ماءُ جو گهر مان ڳلو ڪپيل لاش هٿ

وارڊ 15بلاول ڪالوني واسڻ 28 ورهين جي سميرا زال عمران آرائين جو گهر مان ڳلو ڪپيل لاش مليو

محرابپور (رپورٽر) محرابپور ۾ ٽن ٻارڙن جي ماء جو سندس گهر مان ڳلو ڪپيل لاش هٿ آيو آهي، شهر جي وارڊ نمبر 15 بلاول ڪالوني واسڻ اٽڪل 28 ورهين جي پرڻيل ناري سميرا بيبي زوجه عمران آرائين جو گهر اندر ڳلو ڪيپل لاش پيل مليو، جيڪو اڄ صبح جو ننڍ مان اٿي سندس معصوم ٻچڙن ڏسي پنهنجي عزيزن کي اطلاع ڪيو، اهڙو اطلاع ملڻ تي محرابپور پوليس به واقعي واري هنڌ پهچي جائزو وٺي تفصيل ورتا، ان حوالي سان مقتولا ناري جي ڀاء محمد رمضان ابتدائي طور تي صحافين کي ٻڌايو ته ڀيڻ گهر اندر درزڪو ڪم ۽ ٻارڙن جي شئي وڪرو ڪندي هئي، سندس مڙس مزدوري سانگي ڪراچي ويل هو، ڀيڻ کي ڪنهن گذريل رات دير سان وڏي بيدردي سان ڪهي قتل ڪري وڏو ظلم ڪيو آهي، ڪنهن سان به ڪادشمني ناهي، واقعي جي شفاف جاچ ڪري انصاف فراهم ڪيو وڃي، جڏهن ته محرابپور پوليس واقعي جي وڌيڪ جاچ لاء ڪرائيم سين پوليس ٽيم کي نوشهورفيروز مان گهرائي ورتو آهي، ڪرائم سين ٽيم جي ڪارروائي مڪمل ٿيڻ تائين لاش واقعي واري هنڌ ئي پيل آهي. جنهن بعد مقتولا جي مڙھ کي پوسٽ مارٽم لاء رورل هيلٿ سينٽر جي مرده خاني آندو ويندو، محرابپور پوليس موجب واقعي جي گهڻ رخي جاچ جاري آهي، ابتدائي طور تي پيش آيل واقعي جو ڪارڻ معلوم ٿي ناهي سگهيو، واقعي جي وڌيڪ جاچ ڪئي پئي وڃي، هوڏانهن گهر اندر پنهنجي معصوم ٻچڙن سان گڏجي رهندڙ پورهيت ناري جي قتل تي علائقي ۾ ڏک ۽ خوف واري لهر ڇانيل آهي.