نوشهرو فيروز ڊسٽرڪٽ بار پاران سعيد ميمڻ جي بازيابي لاءِ احتجاجي مظاهرو

سنڌ بار ڪائونسل جي ميمبر ايڊوڪيٽ عبدالستار لهراڻي، شوڪت ٻوھيو ۽ ٻين جي اڳواڻي ۾ احتجاج ڪيو ويو

نوشهرو فيروز (ڊ ر) سعيد ميمڻ جي بازيابي لاءِ ڊسٽرڪٽ بار ايسوسيئيشن نوشهرو فيروز پاران احتجاج، بازيابي لاءِ سخت نعريبازي، وڪيلن پاران 9 ڏينهن اڳ بلوچستان مان اغوا ڪيل ايڪسائيز کاتي جي ريٽائر آفيسر، اديب ۽ شاعر سعيد ميمڻ جي بازيابي لاءِ ڪيل احتجاج جي اڳواڻي سنڌ بار ڪائونسل جي ميمبر ايڊوڪيٽ عبدالستار لهراڻي، ضلع بار جي جنرل سيڪريٽري شوڪت ٻوھيو، اعظم ميمڻ، اختر ڀريجو، مشتاق بڙدي، قادر خانزادو ۽ ٻين ڪئي. احتجاج ڊسٽرڪٽ بار آفيس کان شروع ٿي ريلي جي صورت ۾ جڊيشل ڪامپليڪس جي مئن گيٽ تائين ٿيو. ان موقعي تي ميڊيا سان ڳالهائيندي اڳواڻن چيو ته نوشهرو فيروز واسي سعيد ميمڻ کي اغوا ٿئي 9 ڏينهن گذري ويا آهن پر اڃا تائين سندس ڪو پتو نه پيو پوي، جنهن سبب نه رڳو سندس گهر ڀاتي مٽ مائٽ پريشان آهن پر پوري سنڌ ۾ تشويش جي لهر آهي. اسان سنڌ حڪومت، بلوچستان حڪومت ۽ وفاقي حڪومت کان پرزور مطالبو ٿا ڪيون ته سعيد ميمڻ کي فورن بازياب ڪرايو وڃي ٻي صورت ۾ احتجاج جو دائرو وڌائينداسين ۽ سموري سنڌ جا وڪيل ڀرپور تحريڪ ھلائيندا. وڪيلن چيف جسٽس آف پاڪستان، چيف آف آرمي اسٽاف، صدر پاڪستان ۽ وزيراعظم کان به مطالبو ڪيو ته هو سعيد ميمڻ جي بازيابي لاءِ پنهنجو ڪردار ادا ڪن.