آپا مريم مجيدي جي ياد ۾ سنڌي ادبي سنگت ملير جو تعزيتي ميڙاڪو

تعزيتي ميڙاڪي ۾ اديبن، شاعرن، استادن، سماجي ڪارڪنن ۽ ادب سان لاڳاپيل ماڻهن شرڪت ڪئي

ملير (رپورٽ: عبدالرشيد مورجھريو) سنڌي ادبي سنگت شاخ ملير طرفان نامياري شاعره، تعليمي ماهر ۽ علمي شخصيت آپا مريم مجيدي جي ياد ۾ هڪ تعزيتي ميڙاڪو عوامي پريس ڪلب ملير ۾ منعقد ڪيو ويو، جنهن ۾ اديبن، شاعرن، استادن، سماجي ڪارڪنن ۽ ادب سان لاڳاپيل ماڻهن وڏي انگ ۾ شرڪت ڪئي. ميڙاڪي ۾ مرحومه مريم مجيدي جي ادبي، علمي، تعليمي ۽ شعري خدمتن کي ڀرپور لفظن ۾ ڀيٽا پيش ڪئي وئي، جڏهن ته سندس وڇوڙي کي سنڌي ادب ۽ تعليمي دنيا لاءِ وڏو نقصان قرار ڏنو ويو۔ سنڌي ادبي سنگت ملير جي سيڪريٽري مجيب سنڌي خطاب ڪندي چيو ته آپا مريم مجيدي نه صرف هڪ بهترين شاعره هئي پر هڪ سچي تعليمي ماهر ۽ سماج سڌارڪ پڻ هئي، جنهن پنهنجي سڄي زندگي علم، ادب ۽ شعور جي واڌاري لاءِ وقف ڪري ڇڏي. هن چيو ته سندس شاعري ۾ عورتن جي حقن، سماجي انصاف، محبت ۽ انسانيت جو سگهارو آواز موجود هو، جيڪو هميشه ياد رکيو ويندو۔اديب ۽ شاعره سلطانه قاضي چيو ته آپا مريم مجيدي پنهنجي لکڻين ذريعي سماج ۾ شعور ۽ سچائي جو پيغام ڏنو، سندس وڇوڙو ادب لاءِ هڪ وڏو خال آهي۔ليکڪا عابده گهانگهرو چيو ته مريم مجيدي جهڙيون شخصيتون صديون ۾ پيدا ٿين ٿيون، سندس ڪم ايندڙ نسلن لاءِ رهنمائي جو ذريعو رهندو۔ شاعره امرتا ڏاھري چيو ته مرحومه نه صرف شاعره هئي پر عورتن لاءِ هڪ آواز هئي، جنهن هميشه حوصلي ۽ همت جو درس ڏنو۔راشد لکمير چيو ته مريم مجيدي جي ادبي خدمتن کي هميشه ياد رکيو ويندو ۽ هوءَ سنڌي ادب جو روشن باب هئي۔اياز هڪڙو چيو ته سندس شخصيت علم، اخلاق ۽ انسان دوستي جو پيڪر هئي۔غفور شاه تقوي، اصغر باغي، غلام نبي مگسي، رجب ڀنڊ، سڪندر سرواڻ، يونس خاصخيلي ۽ عبدالخالق ڀٽي به خطاب ڪندي چيو ته آپا مريم مجيدي جو علمي ۽ ادبي سفر سنڌي ادب ۾ هڪ روشن مثال طور هميشه زنده رهندو.