قومي عوامي تحريڪ جي مرڪزي سڏ تي 22مئي جي شهيدن جي ورسي تي احتجاج

شهيد غزالہ بتول صديقي، ستار اُنڙ، شبير بُليدي، سرور بلوچ ۽ اعجاز بلوچ ۽ ٻين شهيدن کي سرخ سلام پيش ڪريون ٿا: اڳواڻ

حيدرآباد(بيورو) قومي عوامي تحريڪ جي مرڪزي سڏ تي شھيد غزالا بتول صديقي سميت 22 مئي جي شھيدن جي ورسي جي سلسلي ۾ قومي عوامي تحريڪ ضلع حيدرآباد طرفان نسيم نگر چوڪ تي احتجاجي مظاهرو ڪيو ويو، جنھن جي اڳواڻي قومي عوامي تحريڪ ضلعي صدر نظير بليدي، بابو ميمن، معشوق چانڊيو، نور حسن جمالي، محمد عمر بليدي، خير محمد چانڊيو ۽ ٻين اڳواڻن شرڪت ڪئي۔ جڏھن تہ سنڌياڻي تحريڪ جي مرڪزي اڳواڻ زينت سمون، نصرت خاصخيلي آغا عباسي پٺاڻ، بابو سولنگي، جمن سولنگي، الطاف نانگراج، ياسين مغيري، دين محمد خاصخيلي، پپو سولنگي سميت وڏي انگ ۾ ڪارڪن شريڪ ٿيا. ان موقعي تي اڳواڻن خطاب ڪندي چيو تہ شهيد غزالہ بتول صديقي، ستار اُنڙ، شبير بُليدي، سرور بلوچ ۽ اعجاز بلوچ سميت 22 مئي جي سمورن شهيدن کي سُرخ سلام پيش ڪيون ٿا. عالمي سامراجي سازش تحت سنڌ کي ٽوڙي نئون اسرائيل بنائڻ جي سازش خلاف 22 مئي تي اياز لطيف پليجو جي اڳواڻي ۾ لياري ۾ عورتن سميت ھزارين ماڻھن محبت سنڌ ريلي ڪڍي، جنھن تي ايم ڪيو ايم جي دھشتگردن حملو ڪيو، جنھن ۾ غزالا بتول صديقي، ستار انڙ، شبير بليدي، اعجاز بلوچ، سرور بلوچ ۽ ٻيا شھيد ٿي ويا پر پوئتي نه ھٽيا. 22 مئي کانپوءِ سنڌ کي ٽوڙڻ جون سازشون ڪندڙ تاريخ ۾ دفن ٿي ويا. اڳواڻن چيو تہ 28 آئيني ترميم سنڌ ۽ ملڪ خلاف سازش آھي. جنھن کي ڪنھن بہ صورت ۾ قبول نہ ڪيو ويندو. اڳواڻن چيو تہ سنڌ جي زمين، درياھ، سمنڊ ۽ وسيلن تي قبضا سنڌ دشمن سازش آھي. ھڪ ڀيرو ٻيھر سنڌ دشمن آئيني ترميمون آڻڻ جي ڪوشش ڪئي پئي وڃي، جيڪا سنڌ جو عوام رد ڪري ٿو.