ٻھارا لڳ ڳوٺ يار محمد خاصخيلي تي پوليس جي چڙهائي، گهرن کي مبينا باهه، عورتون گرفتار

ٺٽو( محمد شفيق ڀٽي) ٻھارا لڳ ڳوٺ يار محمد خاصخيلي تي پوليس چڙهائي ڪري وڏي بربريت ۽ ظلم جو مظاهرو ڪيو آهي. پوليس پاران اٽڪل چار ڪلاڪن تائين سڄي ڳوٺ جو گهيرو ڪري (ڪڙو چاڙهي) گهرن کي باهيون ڏنيون ويون، جڏهن ته گهرن ۾ موجود قيمتي سامان ۽ مال موشي پڻ ڪاهي ويا. ان کان علاوه، گهرن ۾ موجود بيگناهه عورتن ۽ معصوم ٻارڙن کي وحشياڻي تشدد جو نشانو بڻائڻ بعد عورتن کي گرفتار ڪري اڻڄاتل هنڌ منتقل ڪيو ويو آهي، جنهن ڪري سڄي علائقي ۾ سخت ڪاوڙ ۽ خوف واري لهر پکڙجي وئي آهي. ڳوٺاڻن ميڊيا کي دانهيندي چيو ته پوليس سڀئي قانوني ضابطا ۽ اخلاقي حدون پار ڪري چادر ۽ چارديواري جو تقدس پامال ڪيو آهي. چئن ڪلاڪن تائين جاري رهندڙ هن ڪاروائيءَ دوران معصوم ٻارڙن جون رڙيون ٻڌي به پوليس اهلڪارن جو دل نه پگهرجيو. گهرن کي باهه ڏيڻ سبب غريب ڳوٺاڻن جو الهه تلهه سڙي رک ٿي ويو آهي ۽ پوليس گهرن مان ٻيو سامان ۽ جانور پڻ زبردستي ڪاهي کڻي وئي آهي. ڳوٺاڻن ۽ علائقي جي سماجي اڳواڻن سخت لفظن ۾ مذمت ڪئي آهي عورتن ۽ معصوم ٻارڙن تي بيگناهه تشدد ڪرڻ ۽ کين قيد ڪرڻ ڪهڙي قانون ۾ لکيل آهي؟ ڇا پوليس جو ڪم شهرين جي جان و مال جي حفاظت ڪرڻ آهي يا امن پسند ڳوٺن تي چڙهايون ڪري دهشت پکڙڻ آهي ڳوٺ يار محمد خاصخيلي جي متاثرن، سگهڙن ۽ سول سوسائٽي پاران سنڌ جي وڏي وزير، آءِ جي سنڌ، ۽ ڊي آءِ جي لاڳاپيل کي اپيل ڪئي وئي آهي ته هن معاملي جو فوري طور تي مٿانهون نوٽيس ورتو وڃي. ملوث پوليس اهلڪارن خلاف ايف آءِ آر داخل ڪري کين معطل ڪيو وڃي، گرفتار ڪيل عورتن کي فوري طور آزاد ڪيو وڃي ۽ غريب ڳوٺاڻن جي نقصان جو ازالو ڪيو وڃي،