لاڙڪاڻي پوليس پاران دهشتگرد کي گرفتار ڪري وڏي تعداد ۾ هٿيار هٿ ڪرڻ جي دعويٰ

گرفتار جوابدار جي سڃاڻپ پشاور واسي عاصم پٺاڻ طور ٿي، سندس ڪرمنل رڪارڊ چيڪ ڪيو پيو وڃي

لاڙڪاڻو (بيورو) لاڙڪاڻي ۾ پوليس وفاقي سول حساس اداري جي سهڪار سان وليد ٿاڻي جي حد نيو بس ٽرمينل واري علائقي ۾ ڪارروائي ڪندي وڏي دهشتگردي جي منصوبي کي ناڪام بڻائيندي هٿيار فراهم ڪندڙ دهشتگرد کي جديد هٿيارن ۽ وڏي مقدار ۾ گولين سميت گرفتار ڪرڻ جي دعويٰ ڪئي آهي ان حوالي سان ايس ايس پي احمد فيصل چوڌري ٻڌايو ته گرفتار دهشتگرد جي سڃاڻپ عاصم پٺاڻ، رهواسي پشاور صوبه خيبر پختونخواهه طور ٿي آهي، جنهن جو چئني صوبن مان ڪرمنل رڪارڊ چيڪ ڪيو پيو وڃي. هن ٻڌايو ته هٿ آيل هٿيارن ۽ گولين ۾ 2 ايس ايم جي رائفلون، 2 30 بور پسٽل، جن مان هڪ اسٽيل باڊي ۽ هڪ ايم پي 5 ٽائيپ شامل آهن، جڏهن ته مجموعي طور 500 گوليون، 13 ميگزين ۽ 3 ڪپپا پڻ شامل آهن ايس ايس پي موجب گرفتار دهشتگرد رياست خلاف سازشن ۾ ملوث ماڻهن ۽ امن امان ۾ رخنو وجهندڙ شرپسندن کي مختلف ضلعن ۾ هٿيار ۽ گوليون فراهم ڪندو هو.