عمرڪوٽ: ساڍر بائي پاس ڀرسان افسوسناڪ ٽريفڪ حادثو، عورت فوت، پيءُ ۽ پٽ زخمي

عمرڪوٽ (ڊ، ر) عمرڪوٽ جي علائقي ڍورونارو ويجهو ساڍر بائي پاس تي هڪ دل ڏاريندڙ ٽريفڪ حادثي ۾ عورت حياتي وڃائي ويٺي، جڏهن ته ٻه ڄڻا زخمي ٿي پيا، خبر موجب موٽر سائيڪل تي سوار هڪ ئي خاندان جا فرد سفر ڪري رهيا هئا ته اوچتو موٽر سائيڪل جي چين ۾ عورت جو ڪپڙو ڦاسي پيو، جنهن سبب موٽر سائيڪل بي قابو ٿي روڊ تي ڪري پئي، ان ئي دوران پٺيان ايندڙ ٽريڪٽر موٽر سائيڪل مٿان چڙهي ويو، جنهن جي نتيجي ۾ ميران زال وردان ڪولهي موقعي تي ئي فوت ٿي وئي، جڏهن ته وردان ڪولهي ۽ سندس پٽ جميل سخت زخمي ٿي پيا، واقعي جي اطلاع ملندي ئي مقامي ماڻهن ۽ ريسڪيو ٽيم زخمين کي فوري طور علاج لاءِ اسپتال منتقل ڪيو، جتان سندن حالت ڳڻتي جوڳي هئڻ سبب وڌيڪ علاج لاءِ حيدرآباد ريفر ڪيو ويو، ذريعن موجب فوتي ۽ زخمي ٿيل خاندان گابار جا رهواسي آھن، حادثي کان پوءِ علائقي ۾ سوڳ جي لهر ڇانئجي وئي.