گهگهر ۾ ڦر مزاحمت دوران فائرنگ، حافظ فتح محمد بگٽي قتل

اسٽيل ٽائون ٿاڻي جي حد ۾ بدامني وڌي وئ

ملير (رپورٽ: عبدالرشيد مورجھريو) ملير جي اسٽيل ٽائون ٿاڻي جي حد گهگهر ۾ ڏوهن تي ضابطو نه اچي سگهيو، جتي قومي شاهراهه تي سسئي پل ڀرسان نامعلوم هٿياربندن جي فائرنگ ۾ ڀنڀو ڳوٺ واسي حافظ فتح محمد بگٽي سخت زخمي ٿي پيو۔ کيس ڳڻتي جوڳي حالت ۾ اسپتال منتقل ڪيو پئي ويو ته هو زخمن جا سور نه سهندي رستي ۾ ئي فوت ٿي ويو۔ واقعي بعد علائقي ۾ خوف ۽ هراس پکڙجي ويو، جڏهن ته شهرين پاڻ کي غير محفوظ قرار ڏنو آهي۔ ياد رهي ته گذريل سال به ڦر مزاحمت دوران نوجوان عارف اتيرو قتل ٿي ويو هو، جڏهن ته هاڻوڪي واقعي کانپوءِ گهگهر ۾ ڦر دوران مزاحمت تي قتل ٿيندڙن جو انگ پنج تائين پهچي ويو آهي۔ علائقي واسين موجب گهگهر ۽ ڀرپاسي وارن علائقن ۾ روزاني بنيادن تي ڦر، چوري ۽ ٻين ڏوهن جون وارداتون معمول بڻيل آهن، پر پوليس جي مبينا لاپرواهي ۽ عدم دلچسپي سبب ڪيترائي واقعا رپورٽ به ناهن ڪيا ويندا۔ شهرين ۽ مقتول جي وارثن اعليٰ اختيارين کان مطالبو ڪيو آهي ته واقعي ۾ ملوث جوابدارن کي جلد گرفتار ڪري قانون جي ڪٽهڙي ۾ آندو وڃي ۽ گهگهر سميت ڀرپاسي وارن علائقن ۾ وڌيڪ پوليس نفري مقرر ڪري امن امان جي صورتحال بهتر بڻائي وڃي۔