ملير: ايم-نائن حادثي ۾ شهيد ٿيل پوليس اهلڪارن جي نماز جنازه ادا، آءِ جي سنڌ ۽ ٻيا آفيسر شريڪ

آءِ جي سنڌ طرفان شهيدن جي وارثن سان تعزيت، هر ممڪن سهڪار جي خاطري

ملير(رپورٽ: عبدالرشيد مورجھريو) ملير ضلعي جي حدن ۾ ايم نائن موٽروي تي ٽرالر جي پوليس موبائل کي ٽڪر جي نتيجي ۾ شهيد ٿيل سب انسپيڪٽر صاحب خان ۽ ڪانسٽيبل واجد علي جي نماز جنازه ضلعي ايسٽ پوليس هيڊڪوارٽر سعودآباد ڪمپليڪس ملير ۾ ادا ڪئي وئي۔نماز جنازه ۾ آءِ جي سنڌ جاويد عالم اوڍو، ايڊيشنل آءِ جي ڪراچي، ڊي آءِ جي ۽ ايس ايس پي ايسٽ، ايس ايس پي ملير، ايس ايس پي موٽروي سميت اعليٰ پوليس آفيسرن، شهيد اهلڪارن جي وارثن، عزيزن ۽ علائقي واسين وڏي انگ ۾ شرڪت ڪئي۔ آءِ جي سنڌ نماز جنازه ۾ شرڪت دوران شهيد اهلڪارن جي وارثن سان تعزيت ۽ همدردي جو اظهار ڪيو ۽ کين هر ممڪن سهڪار جي يقين دهاني ڪرائي۔آءِ جي سنڌ جاويد عالم اوڍو ان موقعي تي چيو ته “سنڌ پوليس جا شهيد اسان جو فخر آهن”۔بعد ۾ شهيد اهلڪارن جي تدفين لاءِ انتظام مڪمل ڪيا ويا، جڏهن ته پوليس جي چُست دستي کين سلامي پيش ڪئي۔