عمرڪوٽ جي ڳوٺ ۾ عورتن سان ڪچهري، سنڌ ڪميشن جي چيئرپرسن روبينا امان بروهي جو دورو

هر عورت لاءِ ضروري آهي ته هوءَ پنهنجي بنيادي حقن بابت آگاهه هجي: ايڊووڪيٽ روبينا امان بروهي

عمرڪوٽ (رپورٽ:ڪانجي مل رکيسر) سنڌ ڪميشن آن دي اسٽيٽس آف وومين جي چيئرپرسن ايڊووڪيٽ روبينا امان بروهي عمرڪوٽ جي هڪ ڳوٺ جو دورو ڪيو، جتي هن مقامي برادري سان ملاقات ڪئي ۽ عورتن سان پهريون ڀيرو “ڪچهري” سيشن منعقد ڪيو، سيشن جو مقصد عورتن جي مسئلن کي ٻڌڻ، سندن آگاهي وڌائڻ ۽ کين قانوني حقن بابت معلومات مهيا ڪرڻ هو، دوري دوران ڳوٺ جي عورتن چيئرپرسن جو گرمجوشي سان استقبال ڪيو ۽ سندن اچڻ تي خوشي جو اظهار ڪيو، مقامي عورتن چيو ته اهو سندن لاءِ اعزاز جي ڳالهه آهي جو ڪميشن جي چيئرپرسن سندن ڳوٺ اچي سندن مسئلا ۽ تجربا ٻڌڻ لاءِ وقت ڪڍيو، ڪچهري دوران ايڊووڪيٽ روبينا امان بروهي عورتن سان لاڳاپيل مختلف قانونن ۽ سنڌ ۾ عورتن کي حاصل قانوني تحفظ بابت تفصيلي ڳالهه ٻولهه ڪئي، هن شرڪت ڪندڙ عورتن کي آگاهي ڏني ته قانون کين ڪهڙا حق ڏئي ٿو ۽ اهي پنهنجي مسئلن جي حل لاءِ ڪهڙن ادارن سان رابطو ڪري سگهن ٿيون، سيشن دوران عورتن کليل نموني پنهنجا خيال ظاهر ڪيا ۽ مختلف سوال پڻ پڇيا، ڪيترين ئي عورتن سادگي سان سوال ڪيو ته سنڌ ڪميشن انهن لاءِ ڪهڙي ريت مددگار ٿي سگهي ٿي ۽ سندن مسئلن جي حل ۾ ڪهڙو ڪردار ادا ڪري سگهي ٿي، ان موقعي تي ايڊووڪيٽ روبينا امان بروهي چيو ته ڄاڻ ئي بااختياري ڏانهن پهريون ۽ اهم قدم آهي، هن زور ڏنو ته هر عورت لاءِ ضروري آهي ته هوءَ پنهنجي بنيادي حقن بابت آگاهه هجي، ڇو ته قانون تحت کين ڪيترائي حق حاصل آهن، سيشن خوشگوار ماحول ۾ پڄاڻي تي پهتو، جتي مقامي عورتن ۽ برادري جي ميمبرن سان گڏ گروپ فوٽو پڻ ڪڍرايو ويو، اهو موقعو سنڌ ڪميشن ۽ عمرڪوٽ جي ڳوٺ جي عورتن وچ ۾ هڪ مثبت ۽ بامقصد رابطي جي يادگار بڻجي ويو.