گلشنِ معمار ۾ جماعت اسلامي ملير پاران شب بيداري پروگرام منعقد

فلسطين جي مزاحمتي تنظيم حماس جي نمائندي ۽ مزاحمتي اڳواڻ خالد قدومی خصوصي شرڪت ڪئي

ملير(رپورٽ: عبدالرشيد مورجھريو)جماعت اسلامی گڏاپ جي اهتمام هيٺ گلشنِ معمار ۾ هڪ روح پرور شب بيداري پروگرام منعقد ڪيو ويو، جنهن ۾ فلسطين جي مزاحمتي تنظيم حماس جي نمائندي ۽ مزاحمتي اڳواڻ خالد قدومی خصوصي شرڪت ڪئي۔ پروگرام ۾ سنڌ جي نائب امير حافظ نصرالله چنه، جماعت اسلامي گڏاپ جي امير عرفان احمد، نائب امير طارق رحمان، قيم گڊاپ ابوالخير، جماعت اسلامي جي جنرل سيڪريٽري توفيق الدين صديقي، گڏاپ بولهاڙي جي ناظم رياض گوندر ۽ جماعت اسلامی کیاماڑی جي امير مولانا فضل احد سميت ٻين ذميوارن ۽ ڪارڪنن وڏي انگ ۾ شرڪت ڪئي۔ مقرر پنهنجن خطابن ۾ فلسطين جي موجوده صورتحال تي روشني وڌي ۽ فلسطينين سان يڪجهتي جو اظهار ڪيو۔ خالد قدومي پنهنجي خطاب ۾ فلسطيني عوام جي جدوجهد، مزاحمت ۽ عالمي برادري جي ذميوارين بابت تفصيلي ڳالهه ٻولهه ڪئي۔ هن چيو ته فلسطيني عوام پنهنجي حقن ۽ آزادي لاءِ پرعزم آهن ۽ امتِ مسلمه جي اخلاقي ۽ سفارتي حمايت انهن لاءِ انتهائي اهم آهي۔ ٻين مقرر پڻ فلسطيني عوام جي حمايت جاري رکڻ جي عزم جو اعادو ڪيو ۽ چيو ته اهڙن پروگرامن وسيلي عوام ۾ سجاڳي ۽ شعور پيدا ڪيو ويندو رهندو۔ پروگرام جي پڄاڻي تي فلسطين ۽ امتِ مسلمه جي اتحاد ۽ سلامتي لاءِ خصوصي دعا گهري وئي۔