خراب حڪمراني سنڌ ۾ عورتن ۽ ٻارن جي زندگيءَ جھنم بڻائي ڇڏي آهي: اياز لطيف پليجو

سنڌ حڪومت ٻڌائي تہ ڏوھاري حڪومت ۽ رياست کان ڪيترا طاقتور آھن؟ آخر سنڌ ۾ نياڻيون ۽ ٻار ڇو غير محفوظ آھن؟

حيدرآباد (بيورو) قومي عوامي تحريڪ جي سربراھ اياز لطيف پليجي چيو تہ پيپلزپارٽي جي خراب حڪمراني سنڌ ۾ عورتن ۽ ٻارن جي زندگيءَ جھنم بنائي ڇڏي آهي.پيپلز پارٽي ۽ سنڌ حڪومت ٻڌائي تہ ڏوھاري حڪومت ۽ رياست کان ڪيترا طاقتور آھن؟ آخر سنڌ ۾ نياڻيون ۽ ٻار ڇو غير محفوظ آھن؟ ھي سڄو نظام رڳو حڪمران طبقي جو محافظ ۽ انھن لاءِ جنت جھڙو ڇو آھي. اياز لطيف پليجي چيو تہ جمھوريت پيپلزپارٽي جا ھاٿي وانگر ظاھري ڏند آهن پيپلزپارٽي سنڌ ۾ آمريت قائم ڪري جمھوريت جي پٺ ۾ خنجر ھڻي پنهنجي اقتدار جي تابوت ۾ ڪوڪا ٺوڪي رھي آھي پيپلزپارٽي اقتدار جي نشي ۾ مست حڪمران ياد ڪن تہ اقتدار اچڻي وڃڻي شئي آهي ۽ ڪجھ سالن ھوندو آھي پر ڌرتي ۽ سنڌي ماڻهو سدائين لاءِ ھوندا.اياز لطيف پليجي چيو تہ پيپلزپارٽي چاھي ٿي تہ سنڌي ماڻھو سجاڳ ۽ خوشحال ٿيڻ بدران اسان جا غلام ھجن پيپلزپارٽي جي غلط پاليسين جي ڪري سنڌ کي تباھ ڪري ڇڏيو آهي.اياز لطيف پليجي چيو تہ جيستائين پيپلزپارٽي سنڌ جي اقتدار تي قابض رھندي تيستائين سنڌ خوشحالي نٿي حاصل ڪري سگھي. ست ڪڙور سنڌين کي سمجھڻو پوندو تہ موجوده ڪرپٽ نااهل سنڌ حڪومت وٽ سنڌي ماڻهن جي ترقي ۽ خوشحالي بدران انهن جي تباھي جو منصوبو آھي.اياز لطيف پليجي چيو تہ سنڌ کي ھٿ وٺي ڏوھن ۽ منشيات جو ڳڙھ بنايو ويو آھي. شھرن کان وٺي ڳوٺن تائين منشيات فروشن جي نيٽورڪ کي مضبوط ڪيو ويو آھي. سڄي سنڌ ۾ وزيرن، اين پي ايز، ايم اين ايز، سردارن ۽ وڏيرن جي مرضي جا پوليس آفيسر مقرر آھن. پيپلز پارٽي ۽ سنڌ حڪومت ڪرپشن کانپوءِ منشيات کي ڪاروبار بنائي ڇڏيو آھي. نوجوان نسل کي علم، سياست ۽ ميرٽ کان روڪڻ لاءِ منشيات جو عادي بنايو پيو وڃي.