ڏوڪري ۾ بي آءِ ايس پي عملي پاران رجسٽريشن آفيس جا دروازا بند، عورتون پريشان

رجسٽريشن آفيس جا دروازا بند ٿيڻ سبب ڏورانهن علائقن مان آيل عورتون سخت گرمي ۾ عذاب ۾ مبتلا

ڏوڪري(اطهر ميمڻ) ڏوڪري ۾ بينظير انڪم سپورٽ پروگرام جي عملدارن مستحق عورتن جي رجسٽريشن لاءِ قائم ڪيل آفيس ۾ ايندڙ عورتن لاءِ آفيس جا دروازا بند ڪري ڇڏيا، جنھن سبب سخت گرمي ۾ مستحق عورتون آفيس جي دروازي ٻاھران سڄو ڏينھن بيھڻ بعد بنا رجسٽريشن جي گھر واپس موٽڻ معمول بڻجي ويو آهي. ذريعن موجب اسسٽنٽ ڪمپلائين مانيٽرنگ سھيل ڪلھوڙو پنھنجي آء ڊي ھڪ ڊوائيس ھولڊر حوالي ڪئي آھي، جيڪو پرائيوٽ جڳھ تي في ڪارڊ جي رجسٽريشن تي ھڪ ھزار کان 1500 روپيا خرچي وٺڻ بعد مستحق عورت جي سروي ڪري پيو. ان موقعي تي رجسٽريشن لاءِ آيل عورتن مسمات حفيظان، رخسانه، زليخان خاتون، وحيده بيگم ۽ ٻين ميڊيا سان ڳالهائيندي چيو ته اسان رجسٽريشن آفيس ۾ ايندي ڪيترائي مهينا گذري ويا آهن پر هر دفعي واپس ڪيو پيو وڃي.جن عورتن جي سفارش يا رشوت ڏين ٿيون انهن جي جلد رجسٽريشن ڪئي پئي وڃي،سينٽر تي انتظاميا سان ملي ڀڳت ڪري ايجنٽ مافيا سرگرم آهي جيڪي في عورت کان ھڪ ھزار کان 1500 روپيا رشوت وٺي رجسٽريشن ڪرائي وڃي، جڏهن تہ رشوت نہ ڏيندڙ غريب مسڪين عورتون صبح کان نٽھڻ اس ۾ ويهي ويهي واپس موٽي وڃن ٿيون.ھنن چيو ته اس کان بچڻ لاءِ ڪوبه انتظام ناهي، ڪيتريون ئي عورتون اس ۾ بيهوش ٿي وڃن ٿيون، ايتري قدر جو سينٽر تي پکا خراب آھن ۽ پاڻي جو بندوبست به ناهي ڪيو ويو. ٻئي طرف اسسٽنٽ ڊائريڪٽر بسپ ڏوڪري سجاد علي کھڙو پڻ گذريل ڪيترن ئي ڏينھن کان سينٽر تان غير حاضر آهي، سمورو ڪم ڪمپيوٽر آپريٽر حوالي ڪيو ويو آهي. ھنن بسپ چيئرپرسن، ڊي جي بسپ سميت واسطيدار آفيسرن کان مطالبو ڪيو ته سينٽر تي گهربل سهولتون مهيا ڪري، ملوث آفيسرن خلاف خلاف ڪارروائي ڪري ايجنٽ مافيا سميت رشوت خوري بند ڪئي وڃي. ھوڏانھن صحافين طرفان اسسٽنٽ ڊائريڪٽر بسپ ڏوڪري سجاد علي کھڙو سان رابطي جي ڪوشش ڪئي پر ڪال اٽينڊ نه ٿيڻ ڪري سندس موقف معلوم ٿي نه سگھيو.