ملير جي علائقي لٺ بستي ۾ فلوٽنگ جيٽي ۽ جديد ڪميونٽي سينٽر جو افتتاح

افتتاحي تقريب ۾ دوست محمد راهمون، سيد آغا رفيع الله محمود عالم ڄاموٽ، فاطمه مجيد ۽ ٻيا شريڪ

ملير (رپورٽ: عبدالرشيد مورجھريو) ملير جي علائقي لٺ بستي ۾ فلوٽنگ جيٽي ۽ جديد ڪميونٽي سينٽر جو افتتاح ڪيو ويو۔ افتتاحي تقريب ۾ سنڌ حڪومت جون اهم شخصيتون شريڪ ٿيون، جن ۾ وڏي وزير سنڌ جو صلاحڪار براءِ ماحوليات، موسمياتي تبديلي ۽ سامونڊي ترقي دوست محمد راحيمو، قومي اسيمبلي ميمبر سيد آغا رفيع الله، صوبائي اسيمبلي ميمبر ۽ اسٽينڊنگ ڪميٽي براءِ فاريسٽ اينڊ وائلڊ لائف چيئرمين محمود عالم جاموٽ، فشر مين ڪوآپريٽو سوسائٽي چيئرپرسن فاطمه مجيد، عزيز دائود جت، غني دائود جت ۽ امير جت شامل هئا، تقريب کي خطاب ڪندي اڳواڻن چيو ته هي منصوبو سنڌ حڪومت جي عوام دوست پاليسين جو عملي مثال آهي، جنهن جو مقصد سامونڊي علائقن جي ترقي، مقامي آبادي کي بنيادي سهولتون فراهم ڪرڻ ۽ ماحولياتي تحفظ کي يقيني بڻائڻ آهي، هنن عزم ظاهر ڪيو ته سامونڊي پٽي جي مسئلن جي حل ۽ ترقياتي ڪمن جي تسلسل لاءِ وڌيڪ قدم کنيا ويندا، وڏي وزير سنڌ جي صلاحڪار دوست محمد راحيمو چيو ته سندن خاص ڌيان سامونڊي علائقن جي بهتري ۽ ماحولياتي چئلينجن کي منهن ڏيڻ تي مرڪوز آهي، قومي اسيمبلي ميمبر سيد آغا رفيع الله چيو ته هو ملير جي عوام جي نمائندگي ڪندي علائقي جا مسئلا هميشه قومي سطح تي اجاگر ڪندا رهندا، جڏهن ته محمود عالم جاموٽ هن موقعي تي سامونڊي ماحوليات جي تحفظ لاءِ جاري قدمن تي روشني وڌي، مقامي ماڻهن هن منصوبي کي ڀليڪار ڪندي سنڌ حڪومت ۽ چونڊيل نمائندن جا ٿورا مڃيا، هنن چيو ته فلوٽنگ جيٽي ۽ ڪميونٽي سينٽر سان نه رڳو اچ وڃ ۽ سماجي سرگرمين ۾ بهتري ايندي، پر نوجوانن لاءِ روزگار ۽ مثبت سرگرمين جا نوان موقعا پڻ پيدا ٿيندا، تقريب جي پڄاڻي تي عوام کان اپيل ڪئي وئي ته اهي انهن سهولتن جي حفاظت ڪن ۽ ڪميونٽي سينٽر جي سرگرمين ۾ وڌ چڙه ڪري حصو وٺن ته جيئن هن منصوبي مان ڀرپور فائدو حاصل ڪري سگهجي