ملير: هڪ ساله تربيتي پروگرام بابت گرين انسٽي ٽيوٽ آف ٽيڪنالوجي ۾ ورڪشاپ

ورڪشاپ عورتن جي فني تربيت ۽ روزگار جا موقعا فراهم ڪرڻ لاءِ اينگرو پاڪ ۽ اين ايل جي پاران ڪوٺايو ويو

ملير (رپورٽ: عبدالرشيد مورجھريو) عورتن جي فني تربيت ۽ روزگار جا موقعا فراهم ڪرڻ لاءِ اينگرو پاڪ ۽ اين ايل جي پاران هڪ ساله تربيتي پروگرام بابت گرين انسٽي ٽيوٽ آف ٽيڪنالوجي ۾ اهم آگاهي ورڪشاپ منعقد ڪئي ويو۔ پروگرام جو مقصد صنعتي ترقي سان گڏ عورتن کي بااختيار بڻائڻ ۽ کين روزگار لاءِ قابل بڻائڻ آهي۔ ورڪشاپ کي خطاب ڪندي اينگرو پاڪ ۽ اين ايل جي جي ايڇ آر شعبي جي آفيسر خداداد خان چيو ته 18 کان 24 سال عمر واريون گريجوئيٽ ۽ بن قاسم ٽائون جون رهواسي عورتن لاءِ هي هڪ ساله تربيتي پروگرام بهترين موقعو آهي۔ هن ٻڌايو ته پروگرام تحت عورتن کي سيفٽي،آپريشنز،ميڪينيڪل،اليڪٽريڪل،ايڊمنسٽريشن ۽ ويئر هائوسنگ شعبن ۾ عملي تربيت ڏني ويندي، جنهن سان عورتن لاءِ روزگار جا نوان موقعا پيدا ٿيندا۔ ان موقعي تي گرين انسٽي ٽيوٽ آف ٽيڪنالوجي جي ايگزيڪيوٽو ڊائريڪٽر ڊاڪٽر عبدالرحمن جسڪاڻي اينگرو پاڪ ۽ اين ايل جي کي آڙان تربيتي پروگرام شروع ڪرڻ ۽ بن قاسم ٽائون جي عورتن کي موقعو فراهم ڪرڻ تي مبارڪباد ڏني۔ هن اعلان ڪيو ته جي آءِ ٽي عورتن لاءِ تربيتي سهولتون، رهنمائي ۽ آگاهي ورڪشاپس جي انعقاد ۾ بغير معاوضي خدمتون فراهم ڪندو۔ ڊاڪٽر عبدالرحمن جسڪاڻي وڌيڪ چيو ته بن قاسم انڊسٽريل زون ۾ قائم ٻين صنعتي ادارن کي به اينگرو پاڪ ۽ اين ايل جي جي طرز تي محروم شاگردن ۽ شاگردياڻين لاءِ اهڙا تربيتي پروگرام شروع ڪرڻ گهرجن۔ هن چيو ته اهڙن قدمن سان نه رڳو صنعتي صلاحيت ۾ اضافو ٿيندو، پر سماجي ترقي کي پڻ هٿي ملندي ۽ ملڪ ۾ بيروزگاري گهٽائڻ ۾ مدد ملندي۔ورڪشاپ دوران شرڪت ڪندڙن جا سوال پڻ ورتا ويا ۽ تفصيلي جواب ڏنا ويا۔ اينگرو پاڪ ۽ اين ايل جي جي فوڪل پرسن خداداد خان، جي آءِ ٽي انتظاميه جو شڪريو ادا ڪندي چيو ته گرين انسٽي ٽيوٽ آف ٽيڪنالوجي مستقبل ۾ به سماجي ترقي لاءِ هڪ اهم ريسورس سينٽر ثابت ٿيندو۔