ملير ۾ ريتي بجري چوري خلاف پوليس جون ڪارروايون، هڪ جوابدار گرفتار

ملير (رپورٽ: عبدالرشيد مورجھريو) ملير ضلعي جي مختلف علائقن ۾ غيرقانوني ريتي بجري چوري ڪرڻ خلاف پوليس ڪارروايون ڪندي هڪ جوابدار کي گرفتار ڪري ورتو، جڏهن ته ٻي ڪارروائي دوران مقامي ماڻهن، خاص طور عورتن جي مزاحمت سبب جوابدار فرار ٿيڻ ۾ ڪامياب ٿي ويا.مليل ڄاڻ موجب اسٽيل ٽائون پوليس آچالار سالار ڳوٺ ڀرسان غيرقانوني ريتي بجري چوري خلاف ڪارروائي ڪئي.ڪارروائي دوران جوابدار ڊمپر سميت فرار ٿي ويا، جڏهن ته پوليس موقعي تان هڪ شاول پنهنجي تحويل ۾ وٺي ڇڏيو. پوليس موجب ڪارروائي دوران مقامي ماڻهو منظم نموني پوليس خلاف نڪري آيا ۽ وڏي تعداد ۾ عورتن کي اڳيان آڻي پوليس جو گهيراءُ ڪيو ويو، جنهن سبب ڪارروائي متاثر ٿي. ذريعن موجب اهڙين ڪاررواين دوران ڪجهه عورتون مرچ پائوڊر ساڻ کڻي اچن ٿيون ۽ موقعي ملڻ تي پوليس اهلڪارن تي اڇلائي کين منتشر ڪرڻ جي ڪوشش ڪن ٿيون، جنهن سبب قانون لاڳو ڪندڙ ادارن کي اثرائتي ڪارروائي ۾ ڏکيائيون پيش اچن ٿيون. پوليس عملدارن موجب آچالار سالار ڳوٺ ۾ اهڙي مزاحمت جو رجحان بار بار سامهون اچي رهيو آهي، جنهن سبب جوابدار گهڻو ڪري فرار ٿيڻ ۾ ڪامياب ٿي وڃن ٿا. ٻئي طرف گڏاپ سٽي پوليس ڳجهي اطلاع تي حب ندي ڀرسان حب ملير ڪيڊٽ ڪاليج ويجهو ڪارروائي ڪندي ريت بجري سان ڀريل ڊمپر سميت هڪ جوابدار کي گرفتار ڪري ورتو. گرفتار جوابدار جي سڃاڻپ مظفر شاهه ولد گلاب شاهه طور ٿي آهي، جڏهن ته پوليس ڊمپر نمبر TKQ-188 پڻ پنهنجي تحويل ۾ وٺي ڇڏيو.پوليس موجب گرفتار جوابدار گڏاپ سٽي ٿاڻي جي حدن ۾ ٿيندڙ ريتي بجري جي چوري ۾ پڻ ملوث آهي. گرفتار جوابدار خلاف قانوني ڪارروائي ڪندي ڪيس داخل ڪري وڌيڪ جاچ شروع ڪئي وئي آهي.پوليس اختيارين جو چوڻ آهي ته ملير ضلعي ۾ غيرقانوني ريتي بجري ڪڍڻ وارن خلاف ڪارروايون جاري رهنديون ۽ قانون جي ڀڃڪڙي ڪندڙن خلاف سخت قانوني قدم کنيا ويندا.