مورو ويجھو ڳوٺ سيد اڀريو شاھ واسين جو پوليس جي مبينا زيادتين خلاف احتجاجي مظاهرو

يعقوب پنھور، انثار پنھور، جاڙو، صدام، عبدالحميد پنھور، مجاھد، اصغر، غلام قادر ۽ ٻين احتجاج ڪيو

مورو (جاني جماڻي) مورو ويجھو ڳوٺ سيد اڀريو شاھ جي رھواسين پنھور برادريءَ جي ماڻھن پوليس جي ناانصافين ۽ گھرن تي چڙھائي ڪري نوجوان کنڀي ڪوڙا ڪيس داخل ڪرڻ واري عمل خلاف احتجاجي مظاهرو ڪيو ويو جنھن جي اڳواڻي يعقوب پنھور، انثار پنھور، جاڙو، صدام، عبدالحميد پنھور، مجاھد، اصغر، غلام قادر، رحيم، سڪندر، شاھد، فدا پنھور ۽ ٻيا ڪري رھيا ھئا. جتي ھنن چيو ته ھڪ ھفتو اڳ اسان جي گھر تي پوليس چڙھائي ڪئي جنھن جي سيشن ڪورٽ ۾ 22 اي بي داخل ڪئي ته پوليس مڇرجي اسان جي گھرن تي چڙھائي ڪئي ۽ چار نوجوان کنڀي کڻي وئي جن مان ھڪ کي آزاد ڪيو ويو باقي ٽن مان ٻن ڄڻن خادم حسين ۽ انيس پنھور سميت 7 ڄڻن تي پوليس مقابلي جو ڪوڙو ڪيس داخل ڪري ڇڏيو آھي ۽ ھڪ اياز پنھور کي گم ڪيو ويو آھي جيڪو ھن وقت تائين ظاھر ناھي ڪيو ويو. اسان جا نوجوان ڊاڪٽرن وٽ ڊسپينسر آھن ۽ پوليس جو چوڻ آھي ته توھان داخل ڪيل سيشن ڪورٽ ۾ 22 اي بي تان ھٿ کڻو ٻي صورت توھان جي نوجوان کي ھاف يا ڦل فرائي ڪيو ويندو. ھنن الزام ھڻندي چيو ته نوان جتوئي پوليس ايس ايڇ او جميل سولنگي، پوليس اھلڪار سيد عليم شاھ، علي گل لنجار، اي ايس آء غلام حيدر مشوري گھرن تي چڙھائي ڪري چادر چوديواريءَ جو تقدس پائمال ڪيو آھي ۽ اسان جي عورتن تي تشدد ڪيو ويو گرفتاري دوران اسان گرفتاري وارنٽ جي گھر ڪئي پر نه ڏيکاريو ويو ۽ بغير ليڊيز پوليس جي چڙھائي ڪئي وئي آھي گھر مان موٽرسائيڪل پڻ ڪاھي ويا آھن. ھنن چيو ته اسان غريب مسڪين پورھيت ھاري آھيون ھر ايندڙ ڏينھن تي پوليس اسان جي گھرن تي چڙھائي ڪري ٿي جيڪو سراسر ناانصافي ظلم آھي. ھنن گھرو وزير ضياءَ الحسن لنجار، آء جي سنڌ پوليس، ڊي آء جي شھيد بينظير آباد، ايس ايس پي نوشهروفيروز، اي ايس پي مورو سميت وس وارن کان مطالبو ڪيو ته مذڪورا معاملي جو نوٽيس وٺي انصاف تحفظ فراهم ڪيو وڃي.