عمرڪوٽ ۾ نوجوان کي جنھن انداز سان قتل ڪيو ويو آھي، اھو انتھائي سفاڪانہ آھي: اياز لطيف پليجو

اياز لطيف پليجي پاران عمرڪوٽ ۾ نوجوان کي ڳلو ڪپي قتل ڪرڻ واري واقعي جي مذمت

حيدرآباد(بيورو)قومي عوامي تحريڪ جي سربراھ اياز لطيف پليجي عمرڪوٽ ۾ نوجوان کي ڳلو ڪپي قتل ڪرڻ واري واقعي جي مذمت ڪندي قاتلن جي گرفتاري جو مطالبو ڪيو آھي. اياز لطيف پليجي چيو آھي تہ عمرڪوٽ ۾ نوجوان کي جنھن انداز سان قتل ڪيو ويو آھي، اھو انتھائي سفاڪانہ آھي. ڳلو ڪپي مرڻينگ ڪيل نوجوان جي مرڪ ھن سموري کوکلي نظام تي کلي رھي آھي. ھن نظام ۾ ڪير به محفوظ ناھي. ڪنھن جي بہ جان ۽ عزت جي تحفظ ناھي. سڄي سنڌ بدامني جي باھ ۾ سڙي رھي آھي. اڌ سنڌ ڌاڙيلن وٽ يرغمال آھي. باقي سنڌ ڏوھارين جي گھيري ۾ آھي. منشيات کي سنڌ جو اڏو بنايو ويو آھي. باقي صوبا ائين منشيات فروشن وٽ يرغمال ناھن، جيئن سنڌ ۾ بي خوف ٿي منشيات جو ڪاروبار ڪيو وڃي ٿو. اياز لطيف پليجي چيو تہ ھٿ وٺي سنڌ کي ٽارگيٽ ڪيو ويو آھي. ڪجھ ڏينھن عمرڪوٽ جي نوجوان جو سفاڪانہ قتل سوشل ميڊيا جو موضوع رھندو ان کانپوءِ وري ڪو ٻيو نئون سانحو زينت بنجي ويندو. اياز لطيف پليجي چيو تہ سنڌ المناڪ سانحن جو ديس بنايو ويو آھي. وفاق ۽ سنڌ حڪومت تباھي جا ذميوار آھن. حڪمرانن جي ايجنڊا تي صرف ڪرپشن آھي. انھن کي ڦرلٽ کانسواءِ ڪجھ به ياد ناھي. اياز لطيف پليجي چيو ته مھانگائي غريب عوام جي چيلھ چٻي ڪري ڇڏي آھي. زرعي تباھي آبادگارن ء ھارين کي ڪنگال ڪري ڇڏيو آھي. ڪرپشن جي ڪينسر سڄي سماج کي وڪوڙي ورتو آھي. پيپلز پارٽي 18 سالن ۾ کوکلي نعرن ۽ بک، بدحالي ۽ بيروزگاري کانسواءِ سنڌ کي ڪجھ ناھي ڏنو.