گل پلازا میں آگ کیسے لگی؟ سانحے کی تحقیقاتی رپورٹ کے چونکا دینے والے انکشافات

کراچی؛ تحقیقاتی حکام نے عینی شاہدین اور متاثرین کے بیانات کی مدد سے گل پلازا سانحے سے متعلق ابتدائی رپورٹ تیار کر لی ہے۔ ذرائع کے مطابق گل پلازا میں آگ مصنوعی پھولوں کی ایک دکان میں لگی، جہاں بچوں کے کھیلنے کے دوران آگ بھڑک اٹھی۔ امکان ظاہر کیا جا رہا ہے کہ بچے دکان میں ماچس یا لائٹر سے کھیل رہے تھے، جس کے باعث ابتدا میں آگ دکان میں موجود سامان میں لگی اور بعد ازاں بجلی کی تاروں تک پھیل گئی۔ ذرائع کا کہنا ہے کہ آگ شارٹ سرکٹ کے باعث نہیں لگی۔ آگ لگتے ہی عمارت میں موجود افراد باہر نکلنے کے راستوں کی طرف دوڑے، تاہم عمارت کے دروازے بند ہونے کے باعث بھگدڑ مچ گئی۔ ذرائع کے مطابق عمارت میں متعدد دکانیں کھلی ہوئی تھیں، جبکہ عمارت کی چھت کی جانب جانے والے راستے پر بھی گرل نصب تھی۔ آگ لگنے کے نتیجے میں عمارت میں موجود سی سی ٹی وی سسٹم مکمل طور پر متاثر ہو گیا ہے۔