ٹرمپ کی دعوت قبول، پاکستان کا ’’غزہ امن بورڈ‘‘ میں شمولیت کا فیصلہ

اسلام آباد (ویب ڈیسک) — پاکستان نے غزہ میں پائیدار امن کے لیے ’’بورڈ آف پیس‘‘ میں شمولیت کی دعوت قبول کر لی ہے۔ دفترِ خارجہ کے ترجمان نے پاکستان کی جانب سے بورڈ آف پیس میں شمولیت کی دعوت قبول کرنے کی تصدیق کر دی۔ ترجمان نے بتایا کہ امریکی صدر ڈونلڈ ٹرمپ کی جانب سے وزیرِ اعظم شہباز شریف کو بورڈ آف پیس میں شامل ہونے کی دعوت دی گئی تھی۔ پاکستان نے اقوامِ متحدہ کی سلامتی کونسل کی قرارداد 2803 کے تحت غزہ امن منصوبے کی حمایت کا اعلان کیا ہے۔ بورڈ آف پیس کا مقصد غزہ میں مستقل جنگ بندی کے لیے عملی اقدامات کرنا ہے۔ ترجمان کے مطابق پاکستان نے فلسطینی عوام کے لیے انسانی امداد میں اضافے کی ضرورت پر بھی زور دیا ہے اور فلسطینی عوام کے حقوق کی بھرپور حمایت کے عزم کا اعادہ کیا ہے۔ دفترِ خارجہ کے ترجمان نے کہا کہ پاکستان آزاد اور خود مختار فلسطینی ریاست کے قیام کی حمایت کرتا ہے۔ پاکستان کا مؤقف ہے کہ 1967 سے قبل کی سرحدوں پر مشتمل فلسطینی ریاست قائم کی جائے، جس کا دارالحکومت القدس شریف ہو۔ ترجمان نے مزید کہا کہ پاکستان فلسطینی عوام کی تکالیف کے خاتمے کے لیے تعمیری کردار ادا کرتا رہے گا اور بورڈ آف پیس کے پلیٹ فارم سے عملی پیش رفت کی امید ہے۔