ڏوڪري ۾ ڦر دوران قتل ٿيل عورت جا وارث قاتل گرفتار نه ٿيڻ خلاف احتجاج

بيمار پٽ جي دوا وٺي ڳوٺ ويندي ڦر بهاني تشدد ڪري منهنجي زال کي قتل ڪيو ويو هو: الطاف زهراڻي

ڏوڪري(اطهر ميمڻ) ڏوڪري ۾ 2 مھينا اڳ ڦر دوران پورھيت ۽ سندس معصوم پٽ زخمي ٿيڻ ۽ گھرواري قتل ٿيڻ واري واقعي جا جوابدار گرفتار نه ٿيڻ خلاف پورھيت پنھنجي مائٽن سان گڏجي احتجاج ڪيو. ان موقعي تي سونهري پل واسي الطاف زهراڻي، پنهنجي ڌي، پٽ ۽ ڀائٽين سان گڏجي ڏوڪري پريس ڪلب ۾ پريس ڪانفرنس ڪندي چيو ته 3 جنوري تي پنهنجي گهر واري سلطانه خاتون سان گڏجي ڏوڪري مان بيمار پٽ جي دوا وٺي ڳوٺ موٽڻ دوران ھٿياربندن ڦرڻ بھاني سخت تشدد جو نشانو بڻائي فرار ٿي ويا،جنهن بعد لاڙڪاڻي اسپتال ۾ منهنجي زال سلطانہ خاتون فوت ٿي وئي. هن چيو ته مائٽن پوليس سان گڏجي کوجي ڪتن ذريعي پيرا کنيا جيڪي پيرا ڳوٺ غلام قادر انڙ ۾ چانڊيا برادري جي گهرن ۾ پيا هئا، ھن الزام هڻندي چيو ته ڏوڪري پوليس پرويز زهراڻي ۽ ياسين زهراڻي جي چوڻ تي گرفتار جوابدارن کان ڳري رشوت وٺي منھنجو ڪيس لوڙھي رھي آھي. هن چيو ته ڏوڪري پوليس ڪيس کي خراب ڪندي منهنجي وڏي ڀاءُ منظور زهراڻي کي گرفتار ڪري کيس گم ڪري ڇڏيو آهي. هن وڌيڪ چيو ته پرويز زهراڻي ۽ ياسين زهراڻي پوليس کاتي ۾ هجڻ ڪري ڪيس خراب ڪندي اصل جوابدارن کي تحفظ فراهم ڪري رهيا آهن جيڪو سراسر ظلم ۽ ناانصافي آهي. ھن چيو ته پوليس عملدار ياسين زهراڻي ۽ ٻين مان جان جو خطرو آهي، جيڪي مون کي موتمار ڌمڪيون ڏئي رهيا آهن تہ ڳوٺ کان ٻاهر قدم رکيو تہ سموري خاندان کي ماري ڇڏينداسين. ھنن آءِ جي سنڌ، ڊي آءِ جي لاڙڪاڻو ۽ ايس ايس پي لاڙڪاڻو سميت اعلیٰ اختيارين کان مطالبو ڪيو ته گھرواري جي قتل ۾ ملوث اصل جوابدارن کي گرفتار ڪري، گم ڪيل ڀاءُ کي بازياب ڪرائي تحفظ ۽ انصاف فراھم ڪيو وڃي.