رامچند جو اوچتو لاڏاڻو ادبي دنيا لاءِ هڪ وڏو صدمو آهي: احمد سولنگي

سنڌي ادبي سنگت پاران رامچند اوڏ جي اوچتي وڇوڙي تي ڏک جو اظهار

نوشهرو فيروز(ڊر)سنڌي ادبي سنگت سنڌ جي مرڪزي سيڪريٽري جنرل احمد سولنگي، جوائنٽ سيڪريٽري ڀارو مل امراڻي، عورت جوائنٽ سيڪريٽري گل بي بي شاھ، خزانچي ستار ھليو، آڊيٽر مرتضيٰ ڦل ۽ شاخ نوشهرو فيروز جي سيڪريٽري امجد ميمڻ، پنھنجي بيان ۾ نامور شاعر، سنڌي ادبي سنگت جي اڳواڻ، محبوب انسان رامچند اوڏ جي اوچتي وڇوڙي تي ڏک جو اظهار ڪيو آهي، جاري ڪيل بيان ۾ چيو ويو آھي تہ رامچند اوڏ سچائي، سادگي جو روشن مثال هو۔ هن پنهنجي شاعري ۽ عملي ڪردار وسيلي سنڌي ادب ۽ سنڌي ادبي سنگت جي واڌاري لاءِ يادگار خدمتون سرانجام ڏنيون۔ رامچند جو اوچتو لاڏاڻو ادبي دنيا لاءِ هڪ وڏو صدمو آهي، جنهن جو خال آسانيءَ سان پورو ٿيڻ وارو ناهي۔ اڳواڻن مرحوم جي پونئيرن ۽ وارثن سان دلي همدردي جو ظاهر ڪيو، جڏهن ته سنڌ سنگت پاران رامچند اوڏ جي وڇوڙي تي 3 ڏينهن سوڳ جو اعلان ڪندي چيو آهي ته سموريون شاخون پنهنجي ساٿي جي وڇوڙي جي حوالي سان گڏجاڻيون گُهرائي ڀيٽا پيش ڪن، ته جيئن سنگت ساٿي گهر جا ڀاتي واري ڳالهه جيان هر ڪارڪن جي ڏک ۽ وڇوڙي کي پنهنجي ڏک سان ڀيٽي سگهجي.