نوشهرو فيروز ۾ نوجوانن جي صلاحيتن کي اجاگر ڪرڻ لاءِ يوٿ انگيجمنٽ ميلو منعقد

ضلعي جي مختلف سرڪاري ۽ خانگي اسڪولن جي شاگردن ۽ شاگردياڻين وڏي جوش ۽ جذبي سان شرڪت ڪئي

نوشهرو فيروز(ڊ ر)محڪمه اسپورٽس نوشهرو فيروز پاران نوجوانن جي صلاحيتن کي اجاگر ڪرڻ لاءِ شاندار يوٿ انگيجمنٽ ميلو منعقد ڪيو ويو، جنهن ۾ ضلعي جي مختلف سرڪاري ۽ خانگي اسڪولن جي شاگردن ۽ شاگردياڻين وڏي جوش ۽ جذبي سان شرڪت ڪئي. ميلي دوران تعليمي، سائنسي، ثقافتي ۽ تخليقي سرگرمين تي ٻڌل مختلف اسٽال لڳايا ويا، جتي شاگردن پنهنجي قابليتن جو ڀرپور مظاهرو ڪيو. ميلي ۾ شهرين، استادن، والدين ۽ سماجي شخصيتن وڏي انگ ۾ شرڪت ڪري نوجوانن جي حوصلا افزائي ڪئي. تقريب کي خطاب ڪندي روحل احمد کوسه چيو ته نوجوانن جو ٽيلنٽ ڏسي دلي سڪون مليو آهي، اهڙا پروگرام نوجوان نسل کي مثبت سرگرمين ڏانهن آڻڻ ۾ اهم ڪردار ادا ڪن ٿا. هن چيو ته جيڪڏهن نوجوانن کي مناسب موقعا فراهم ڪيا وڃن ته هو معاشري لاءِ وڏو اثاثو بڻجي سگهن ٿا. ان موقعي تي معيز حسن سومرو ۽ رضوان ملاح ٻڌايو ته حڪومت سنڌ جي هدايتن تي ميلي جو انعقاد ڪيو ويو آهي ته جيئن نوجوانن جي لڪل صلاحيتن کي سامهون آڻي کين صحتمند سرگرمين ۾ مصروف رکجي ۽ سماج ۾ مثبت سوچ کي هٿي ملي. ميلي جي پڄاڻيءَ تي بهترين صحافتي خدمتون انجام ڏيڻ تي پريس ڪلب نوشهرو فيروز جي صدر محمد يونس راجپر، ۽ ٺاروشاھ صحافين شاهد سومرو ۽ شبیر اجن کي شيلڊون ڏئي اعزاز سان نوازيو ويو.