اجلاس ۾ ضلعي جي سڀني اسسٽنٽ ڪمشنرن، روينيو آفيسرن، سرڪاري کاتن جي آفيسرن جي به شرڪت
نوشهرو فيروز(ڊ ر)رمضان المبارڪ جي مقدس مهيني جي دوران روزمرهه استعمال جي شين جا اگهن مقرر ڪرڻ منافعي خوري کي روڪڻ۽ شهرين کي وڌ کان وڌ رليف فراهم ڪرڻ بابت هڪ اهم گڏجاڻي اڄ ڊپٽي ڪمشنر آفيس نوشهرو فيروز ۾ اسسٽنٽ ڪمشنر نوشهرو فيروز محمد عثمان عارف جي صدارت ۾ منعقد ٿي ۔گڏجاڻي ۾ ضلعي جي سڀني اسسٽنٽ ڪمشنرن، روينيو آفيسرن، مختلف سرڪاري کاتن جي آفيسرن، مارڪيٽ ڪميٽي جي نمائندن، پرائس ڪنٽرول مجسٽريٽن، واپاري برادري، هول سيلرز ۽ دوڪاندارن شرڪت ڪئي۔ گڏجاڻي جو بنيادي مقصد رمضان المبارڪ دوران عوام کي اٽو، کنڊ، گيهه، دالون، چانور، ڀاڄيون، ميوا، گوشت سميت ٻين ضروري شين مقرر ۽ مناسب اگهن تي فراهم ڪرڻ کي يقيني بڻائڻ هو۔ان موقعي تي خطاب ڪندي اسسٽنٽ ڪمشنر محمد عثمان عارف چيو ته رمضان المبارڪ صبر، برداشت ۽ خدمتِ خلق جو مهينو آهي، تنهنڪري هڪ مسلمان ۽ ذميوار شهري جي حيثيت ۾ اسان سڀني تي فرض آهي ته هن بابرڪت مهيني جو مڪمل احترام ڪريون ۽ شهرين کي هر ممڪن سهولت فراهم ڪريون۔ هن واضح ڪيو ته ضلعي انتظاميه طرفان سرڪاري ريٽ لسٽ جاري ڪئي ويندي ۽ ان تي سختي سان عملدرآمد ڪرايو ويندو۔هن واپارين کي هدايت ڪئي ته مقرر ڪيل ريٽ لسٽ نمايان هنڌن تي لڳائي وڃي ۽ مقرر اگهن کان وڌيڪ وصولي هرگز نه ڪئي وڃي۔ هن خبردار ڪيو ته ذخيره اندوزي، مصنوعي مهانگائي ۽ ناجائز منافعي خوري ۾ ملوث ماڻهن خلاف سخت قانوني ڪارروائي ڪئي ويندي، جڏهن ته خلاف ورزي ڪندڙن تي ڏنڊ لاڳو ڪرڻ سميت ٻيون قانوني ڪارروائيون پڻ عمل ۾ آنديون وينديون۔گڏجاڻي ۾ مختلف کاتن جي آفيسرن پڻ پنهنجون تجويزون پيش ڪيون ۽ ان عزم جو اظهار ڪيو ته رمضان المبارڪ دوران گڏيل حڪمتِ عملي تحت مارڪيٽن جي باقاعده نگراني، اوچتا دورا ۽ اگهن جي چڪاس جو عمل جاري رکيو ويندو ته جيئن عوام کي حقيقي رليف فراهم ٿي سگهي۔واپاري نمائندن پڻ ضلعي انتظاميه سان مڪمل سهڪار جو يقين ڏياريو ۽ چيو ته هو مقرر ڪيل اگهن تي شين جي فراهمي کي يقيني بڻائيندا۔گڏجاڻي جي پڄاڻي تي رمضان المبارڪ دوران عوامي سهولت کي نظر ۾ رکندي روزمرهه استعمال جي مختلف شين جا اگهه باهمي صلاح مشوري سان منتخب ڪري متفقه طور مقرر ڪيا ويا، جن تي سختي سان عملدرآمد ڪرڻ جو فيصلو ڪيو ويو۔
0 تبصرے