مڪلي ۾ ايم اين اي صادق علي ميمڻ جي صدارت هيٺ اهم اجلاس منعقد

اجلاس ۾ ضلعي ٺٽي ۾ ڪارپوريٽ سوشل ريسپانسبلٽي (سي ايس آر) فنڊن تحت هلندڙ ترقياتي منصوبن جو تفصيلي جائزو ورتو ويو

ٺٽو( شفيق ڀٽي) چيئرمين پيٽروليم سوشل ڊولپمينٽ ڪميٽي ۽ سوشل ويلفيئر ڪميٽي ايم اين اي صادق علي ميمڻ جي صدارت هيٺ دربار هال مڪلي ۾ هڪ اهم اجلاس منعقد ٿيو، جنهن ۾ ضلعي ٺٽي ۾ ڪارپوريٽ سوشل ريسپانسبلٽي (سي ايس آر) فنڊن تحت هلندڙ ترقياتي منصوبن جو تفصيلي جائزو ورتو ويو. اجلاس ۾ ڪميٽين جي سيڪريٽري ڊپٽي ڪمشنر ٺٽو سرمد علي ڀاڳت، سنڌ يونيورسٽي ڪيمپس ٺٽو جي پرو وائس چانسلر پروفيسر ڊاڪٽر مصباح بي بي سميت مختلف سرڪاري کاتن ۽ تيل ڪمپنين جي نمائندن شرڪت ڪئي. اجلاس کي خطاب ڪندي ايم اين اي صادق علي ميمڻ لاڳاپيل عملدارن کي هدايت ڪئي ته ضلعي ۾ هلندڙ سمورن ترقياتي منصوبن جي اڳڀرائي بابت جامع رپورٽ جلد پيش ڪئي وڃي. هن چيو ته جن اسڪولن، صحت مرڪزن ۽ آر او پلانٽن جي بحالي جي ضرورت آهي انهن جي سروي ڪري تصويرن سان گڏ رپورٽ پيش ڪرڻ سميت سي ايس آر فندن جي وصولي ۽ خرچ بابت پڻ تفصيلي آگاهي فراهم ڪئي وڃي. ان موقعي تي ڊپٽي ڪمشنر ٺٽو سرمد علي ڀاڳت چيو ته ضلعي جي مجموعي بهتري ۽ عوامي سهولتن جي فراهمي لاءِ سي ايس آر فنڊن جو شفاف ۽ موثر استعمال انتهائي ضروري آهي. هن لاڳاپيل کاتن جي عملدارن کي هدايت ڪئي ته جاري ۽ تجويز ڪيل منصوبن ۾ معيار تي ڪنهن به قسم جو سمجهوتو نه ڪيو وڃي ۽ سڀئي رٿائون وقت سر مڪمل ڪيون وڃن. ڊپٽي ڪمشنر وڌيڪ چيو ته تعليم، صحت ۽ صاف پاڻي جهڙن بنيادي شعبن تي خاص ڌيان ڏنو وڃي جڏهن ته ڪوسٽل ايرياز ۾ ماحولياتي تحفظ کي اوليت ڏيندي مينگروز جي واڌاري لاءِ گڏيل ڪوششون ڪيون وڃن. ايم اين اي صادق علي ميمڻ وڌيڪ چيو ته ڪوسٽل ايرياز ۾ ترقياتي ڪمن لاءِ واضح ۽ جامع پروپوزل تيار ڪيا وڃن ته جيئن علائقي جي ماڻهن کي حقيقي فائدو پهچي سگهي. هن سمورن لاڳاپيل کاتن کي هدايت ڪئي ته سي ايس آر فندن جي بهتر استعمال بابت پنهنجون تجويزون جلد پيش ڪن تہ جيئن ايندڙ اجلاس ۾ انهن جو جائزو وٺي ضلعي جي تعمير ۽ ترقي لاءِ اهم فيصلا ڪري سگهجن. اجلاس دوران ڪاليجن ۽ يونيورسٽين ۾ تعليم حاصل ڪندڙ ضلعي ٺٽي جي غريب ۽ مستحق شاگردن ۽ شاگردياڻين جي مالي سهائتا لاءِ اسڪالرشپ فنڊز مقرر ڪرڻ جو پڻ فيصلو ڪيو ويو. اجلاس ۾ سنڌ يونيورسٽي جي ڊائريڪٽر ڊاڪٽر مختيار احمد، چيف آفيسر ضلعي ڪائونسل ٺٽو علي حيدر شاهه، ضلعي جنرل سيڪريٽري پاڪستان پيپلز پارٽي امتياز احمد قريشي، سابق چيئرمين ميونسپل ڪميٽي ٺٽو ممتاز علي ميمڻ، آفتاب جاويد ميمڻ، چيئرمين ٽائون ڪميٽي گهوڙاٻاري محمد رمضان پنھور، چيئرمين ٽائون ڪميٽي ڳاڙھو حاجي محمد صديق خاصخيلي سميت ماڙي پيٽروليم، او جي ڊي سي ۽ ٻين تيل ڪمپنين جا نمائندا ۽ صحت، تعليم، روينيو، بلڊنگز، پبلڪ هيلٿ، ايجوڪيشن ورڪس، هاءِ ويز ۽ ٻين لاڳاپيل کاتن جا عملدار پڻ موجود هئا.