ملير خرم آباد ۾ مال جي واڙي کي باهه وڪوڙي ورتو, اطلاع تي ريسڪيو ٽيمون واقعي واري هنڌ پهچي ويون

ڪيٽل فارم ۾ موجود جانورن ۽ ملڪيت کي بچائڻ جون ڪوششون

ملير (رپورٽ: عبدالرشيد مورجھريو)ملير جي علائقي خرم آباد، فاروق ولاز ڀرسان واقع جانورن جي مال جي واڙي کي اوچتو باهه وڪوڙي ويئي جنهن جي اطلاع ملڻ شرط فائر اينڊ ريسڪيو ٽيمون فوري طور تي واقعي واري هنڌ پهچي ويون.ريسڪيو 1122 جي ترجمان موجب واقعي جي اطلاع سينٽرل ڪمانڊ اينڊ ڪنٽرول ريسڪيو 1122 کي ملي، جنهن کان پوءِ فائر اينڊ ريسڪيو ٽيم ايمبولينس ۽ فائر بريگيڊ ٽرڪ سميت فوري طور واقعي واري هنڌ موڪلي وئي. ريسڪيو عملي پاران باهه تي ضابطو آڻڻ لاءِ ڀرپور ڪوششون جاري آهن.ترجمان جو وڌيڪ چوڻ آهي ته باهه لڳڻ جي نوعيت ۽ ممڪن نقصانن جو جائزو ورتو پيو وڃي، جڏهن ته شروعاتي طور ڪنهن به جاني نقصان جي اطلاع ناهي ملي. بهرحال، ڪيٽل فارم ۾ موجود جانورن ۽ ملڪيت کي بچائڻ لاءِ ريسڪيو ٽيمون مصروفِ عمل آهن. ريسڪيو عملي موجب باهه تي ضابطو آڻڻ کان پوءِ واقعي جي سببن بابت جاچ ڪئي ويندي. علائقي پوليس به واقعي واري هنڌ پهچي سيڪيورٽي انتظامن ۽ ضروري قانوني ڪارروائي ۾ مصروف آهي.