عالمی کامیابیوں کی کہانیاں نئی نسل کو متاثر کرنے لگیں: ٹیکنوفیسٹ 2026 کے لیے نوجوان جدت کار تیار

دنیا کے سب سے بڑے ایرو اسپیس اور ٹیکنالوجی فیسٹیول ٹیکنوفیسٹ 2026 کی تیاریاں زور و شور سے جاری ہیں، جو تاریخ، سائنس اور مستقبل کے سنگم پر لاکھوں نوجوان جدت کاروں کو ایک پلیٹ فارم پر اکٹھا کرنے کا وعدہ کرتا ہے۔ 75 ملین ترک لیرا کے انعامات اور 100 ملین ترک لیرا سے زائد مالی معاونت کے ساتھ ٹیکنوفیسٹ 2026 کا انعقاد 30 ستمبر سے 4 اکتوبر تک GAP ایئرپورٹ، شانلی عرفہ میں ہوگا،یہ شہر “تاریخ کے نقطۂ آغاز” کے طور پر جانا جاتا ہے۔ T3 فاؤنڈیشن اور جمہوریہ ترکیہ کی وزارتِ صنعت و ٹیکنالوجی کی قیادت میں منعقد ہونے والا ٹیکنوفیسٹ ایک عالمی پلیٹ فارم بن چکا ہے جہاں خیالات عملی ٹیکنالوجیز میں ڈھلتے ہیں۔ 2026 کے ٹیکنالوجی مقابلوں کے لیے درخواستیں، جو 52 مقابلوں اور 127 ذیلی کیٹیگریز پر مشتمل ہیں، 20 فروری تک جمع کرائی جا سکتی ہیں۔ اس سال فیسٹیول میں راکٹ ٹیکنالوجی، بغیر پائلٹ فضائی گاڑیاں (UAVs)، زرعی ٹیکنالوجیز، صحت میں مصنوعی ذہانت، سیٹلائٹ کمیونیکیشن اور ایئر ڈیفنس سسٹمز جیسے جدید شعبوں میں مقابلے شامل ہیں۔ اس کے علاوہ پہلی بار الیکٹرانک وارفیئر، ایڈوانسڈ آٹونومس سسٹمز، مائننگ ٹیکنالوجیز، FPV ڈرون ٹریکنگ اور ٹیکنالوجیز فار ہیومینٹی جیسے مقابلے بھی متعارف کرائے جا رہے ہیں، جو شرکاء کو ابھرتی ہوئی اسٹریٹجک ٹیکنالوجیز میں عملی تجربہ فراہم کریں گے۔ 2018 میں آغاز کے بعد سے ٹیکنوفیسٹ کو 40 لاکھ سے زائد درخواستیں موصول ہو چکی ہیں، اور یہ پرائمری اسکول سے پوسٹ گریجویٹ سطح تک کے طلبہ کے لیے ایک لانچ پیڈ بن چکا ہے۔ 2026 میں بھی ہزاروں نوجوان مقابلوں میں حصہ لے کر مستقبل کو شکل دینے والی اختراعات پیش کریں گے۔ ٹیکنوفیسٹ کی عالمی رسائی میں مسلسل اضافہ ہو رہا ہے۔ حال ہی میں ترک جمہوریہ شمالی قبرص میں منعقدہ ٹیکنوفیسٹ ایرو اسپیس فیسٹیول میں پاکستانی مڈل اسکول کے طلبہ کی ایک ٹیم نے سوشل انوویشن کیٹیگری میں پہلا انعام حاصل کیا۔ اسماء فاطمہ اور عنایہ خان نے اپنے استاد گوہر خورشید کی رہنمائی میں یہ اعزاز حاصل کیا اور بعد ازاں ترک صدر رجب طیب اردوان سے ملاقات کر کے انعام وصول کیا۔ پاک ترک معارف انٹرنیشنل اسکولز اینڈ کالجز کے مطابق یہ کامیابی ٹیکنوفیسٹ کے اس عزم کی عکاسی کرتی ہے کہ وہ سرحدوں سے ماورا نوجوان ذہنوں کو بااختیار بناتا ہے۔ گزشتہ برس استنبول، انقرہ اور ازمیر میں ہونے والے مقابلوں میں 3 لاکھ 33 ہزار سے زائد ٹیموں اور 10 لاکھ سے زیادہ شرکاء نے حصہ لیا، جو ترکی کے 81 صوبوں اور 96 ممالک سے تعلق رکھتے تھے۔ اپنی وسعت اور جدت کے باعث ٹیکنوفیسٹ کو “فیسٹیول آف فرسٹس” کہا جاتا ہے، جہاں اختراع کو مواقع میسر آتے ہیں۔ ٹیکنوفیسٹ 2026 کے لیے درخواستوں کے آغاز کے ساتھ ہی نوجوان ٹیکنالوجی کے شوقین افراد، خواب دیکھنے والے اور مستقبل کے انجینئرز کو دنیا کے بااثر ترین ٹیکنالوجی ایونٹس میں شرکت کی دعوت دی جاتی ہے۔ دلچسپی رکھنے والے امیدوار 20 فروری تک www.teknofest.org پر درخواست جمع کرا سکتے ہیں۔