لاہور میں کرین پر چڑھ کر احتجاج، شہری کا وزیرِ اعلیٰ مریم نواز سے ملاقات کا مطالبہ

لاہور میں ایم پی اے ہاسٹلز کی زیرِ تعمیر عمارت پر کرین پر چڑھنے والے شخص کو مذاکرات کے بعد بحفاظت نیچے اتار لیا گیا۔

لاہور میں ایم پی اے ہاسٹلز کی زیرِ تعمیر عمارت میں نصب کرین پر ایک شخص کے چڑھ جانے سے صورتحال کشیدہ ہو گئی، جب شہری نے وزیرِ اعلیٰ پنجاب مریم نواز سے ملاقات کا مطالبہ کر دیا۔ واقعے کی اطلاع ملتے ہی اسمبلی سیکیورٹی حکام اور ریسکیو اہلکار موقع پر پہنچ گئے اور کرین پر چڑھے شخص کو بحفاظت نیچے اتارنے کی کوششیں شروع کی گئیں۔ تاہم شہری کا مؤقف تھا کہ جب تک وزیرِ اعلیٰ سے ملاقات نہیں کروائی جاتی، وہ نیچے نہیں آئے گا۔ ریسکیو اہلکاروں نے شہری کو یقین دہانی کروائی کہ نیچے آنے کے بعد ملاقات کا بندوبست کیا جائے گا۔ بعد ازاں وزیرِ اعلیٰ پنجاب کے سیاسی مشیر ذیشان ملک بھی ایم پی اے ہاسٹل پہنچے اور انہوں نے فون پر کرین پر موجود شخص سے بات چیت کی۔ ذیشان ملک کی جانب سے دی گئی یقین دہانی کے بعد شہری نیچے اترنے پر آمادہ ہوا، جس کے بعد ریسکیو اہلکاروں نے اسے بحفاظت کرین سے نیچے اتار لیا۔ واقعے کے بعد علاقے میں سیکیورٹی صورتحال معمول پر آ گئی۔