شہرت سے بے گھری تک: نکلوڈیئن کا سابق چائلڈ اسٹار کیلیفورنیا کی سڑکوں پر لاوارث زندگی گزارنے پر مجبور

نکلوڈیئن کے مقبول شو کے سابق چائلڈ اداکار ٹیلر چیس کی سڑکوں پر زندگی کی ویڈیو وائرل ہونے کے بعد شہرت کے سیاہ پہلو پر نئی بحث چھڑ گئی۔

امریکی ٹی وی چینل نکلوڈیئن کے ایک مقبول شو میں بطور چائلڈ اسٹار کام کرنے والے اداکار ٹیلر چیس کو امریکا کی ریاست کیلیفورنیا کی سڑکوں پر بے گھر اور لاوارث حالت میں دیکھا گیا ہے، جس پر سوشل میڈیا پر شدید تشویش کا اظہار کیا جا رہا ہے۔ ٹیلر چیس نے 2004 سے 2007 کے دوران نشر ہونے والے شو میں "مارٹن کوئرلی" کا کردار ادا کیا تھا، جہاں انہوں نے ڈیوون ورک ہائزر اور ڈینیئل کرٹس لی کے ساتھ کام کیا۔ ناظرین انہیں ایک خاموش اور سنجیدہ کردار کے طور پر یاد کرتے ہیں، اسی لیے ان کی موجودہ حالت مداحوں کے لیے خاصی دل دہلا دینے والی ثابت ہوئی ہے۔ 36 سالہ ٹیلر چیس کی حالیہ ویڈیو سوشل میڈیا پر وائرل ہوئی، جس میں انہیں سڑک پر سوتے ہوئے اور بوسیدہ کپڑوں میں ملبوس دیکھا جا سکتا ہے۔ ویڈیو میں انہوں نے خود اس بات کی تصدیق بھی کی کہ وہ اسی نکلوڈیئن شو کا حصہ رہ چکے ہیں۔ ویڈیو کے وائرل ہونے کے بعد سابق چائلڈ اداکار کو شہرت کے بعد درپیش مشکلات پر ایک نئی بحث شروع ہو گئی، جبکہ ان کی مدد کے لیے چندہ مہم بھی چلائی گئی، جس کے ذریعے 1200 ڈالرز سے زائد رقم جمع ہوئی۔ تاہم بعد ازاں یہ مہم ان کی والدہ نے بند کروا دی۔ ان کا کہنا تھا کہ ٹیلر بائی پولر ڈس آرڈر میں مبتلا ہیں اور انہیں فوری مالی امداد کے بجائے طویل المدتی علاج، ذہنی استحکام اور مستقل رہائش کی ضرورت ہے۔ اداکار کی والدہ کے مطابق ٹیلر کو پیسوں کے بجائے طبی مدد درکار ہے، مگر وہ علاج سے انکار کرتے ہیں، دواؤں کے لیے رقم سنبھال نہیں پاتے اور ان کے موبائل فون بھی اکثر گم ہو جاتے ہیں۔ ساتھی اداکاروں کا کہنا ہے کہ وہ ٹیلر چیس کو دوبارہ بہتر زندگی کی طرف لانے کے لیے ہر ممکن تعاون کریں گے۔