مضبوط اور عوام دوست پولیس داخلی سلامتی کے لیے ناگزیر ہے: فیلڈ مارشل

راولپنڈی (ویب ڈیسک) فیلڈ مارشل عاصم منیر نے کہا ہے کہ مضبوط اور عوام دوست پولیس داخلی سلامتی کے لیے ناگزیر ہے۔ قانون اور امن و امان کا نفاذ پولیس کی ایک مقدس امانت ہے، اور مسلح افواج ہمیشہ پاکستان پولیس کے شانہ بشانہ کھڑی رہیں گی۔ آئی ایس پی آر کے مطابق فیلڈ مارشل عاصم منیر نے نیشنل پولیس اکیڈمی اسلام آباد کا دورہ کیا اور پولیس سروس آف پاکستان کے افسران سے ملاقات اور گفتگو کی۔ آئی ایس پی آر نے بتایا کہ نیشنل پولیس اکیڈمی میں فیلڈ مارشل کا شاندار استقبال کیا گیا۔ انہیں پولیس کے دستے کی جانب سے گارڈ آف آنر پیش کیا گیا۔ فیلڈ مارشل نے پولیس شہداء کی یادگار پر پھول رکھے، فاتحہ خوانی کی اور شہداء کو خراجِ عقیدت پیش کیا۔ فیلڈ مارشل نے دہشت گردی، جرائم اور سیکیورٹی چیلنجز کے خلاف جدوجہد میں پولیس اہلکاروں کی قربانیوں کو سراہا۔ انہوں نے آئی جیز، ایڈیشنل آئی جیز اور سینئر افسران سے خطاب کرتے ہوئے بین الاداراتی تعاون اور جدید پولیسنگ کی اہمیت پر زور دیا۔ آئی ایس پی آر کے مطابق فیلڈ مارشل نے عوامی اعتماد کو قانون نافذ کرنے والے اداروں کا سرمایہ قرار دیتے ہوئے کہا کہ مضبوط اور عوام دوست پولیس داخلی سلامتی کے لیے ناگزیر ہے۔ قانون اور امن و امان کا نفاذ پولیس کی مقدس ذمہ داری ہے، اور مسلح افواج ہمیشہ پاکستان پولیس کے ساتھ کھڑی رہیں گی۔