مغربی کنارے میں اسرائیلی آبادکاروں کے حملے، فلسطینی گھروں کو نذرآتش کرنے کی ویڈیوز سامنے آ گئیں

اسرائیلی آبادکاروں کے فلسطینی بستیوں پر حملوں میں گھروں کو آگ لگا دی گئی، 4 فلسطینی زخمی جبکہ اسرائیلی میڈیا نے حملوں کی ویڈیوز نشر کر دیں۔

مغربی کنارے میں اسرائیلی آبادکاروں نے فلسطینی آبادی پر حملہ کرتے ہوئے گھروں کو آگ لگا دی، جس کے نتیجے میں کم از کم 4 فلسطینی زخمی ہو گئے۔ اسرائیلی میڈیا رپورٹس کے مطابق شدت پسند آبادکاروں نے 8 گھروں اور 2 گاڑیوں کو نذرِ آتش کیا۔ اسرائیلی میڈیا نے یہودی آبادکاروں کے حملوں کی ریکارڈ شدہ ویڈیوز بھی جاری کر دی ہیں، جن میں آگ زنی اور توڑ پھوڑ کے مناظر واضح طور پر دیکھے جا سکتے ہیں۔ اسرائیلی فوج کے اعداد و شمار کے مطابق سال 2025 کے دوران یہودی قوم پرستانہ جرائم اور آبادکاروں کے تشدد کے 750 سے زائد واقعات ریکارڈ کیے جا چکے ہیں، جبکہ فوج نے بھی یہودی قوم پرست حملوں کے واقعات کو تسلیم کر لیا ہے۔ اعداد و شمار کے مطابق سال 2024 میں بھی یہودی آبادکاروں نے فلسطینیوں پر 675 حملے کیے تھے۔ تاہم اسرائیلی میڈیا کا کہنا ہے کہ یہودی شدت پسندوں کے خلاف قانونی کارروائی شاذ و نادر ہی کی جاتی ہے۔ رپورٹس میں بتایا گیا ہے کہ اسرائیل کی سخت گیر حکومت فلسطینیوں پر ہونے والے حملوں کو نظر انداز کرتی ہے، جبکہ وزیر اعظم نتین یاہو اور قومی سلامتی کے مشیر اتمار بن گوئیر بھی ان واقعات پر مؤثر کارروائی سے گریز کرتے رہے ہیں۔ اسرائیلی میڈیا کے مطابق آبادکاروں کے حملوں کی تحقیقات میں 73 فیصد تک کمی آ چکی ہے، جس سے متاثرہ فلسطینیوں کو انصاف ملنے کے امکانات مزید کم ہو گئے ہیں۔