بدين ۾ ڪيلاش ڪولھي، دادو ۾ نادر جمالي، ٺٽو ۾ علي بخش ملاح، هي لاش پيپلزپارٽي رڳو ٽن چئن ڏينهن ۾ ڏنا آهن: اياز لطيف پليجي

حيدرآباد (بيورو)قومي عوامي تحريڪ جي سربراھ اياز لطيف پليجي چيو تہ پيپلزپارٽي سنڌ کي مقتل گاھ بڻائي ڇڏيو آهي. بدين ۾ ڪيلاش ڪولھي، دادو ۾ نادر جمالي، ٺٽو ۾ علي بخش ملاح هي لاش پيپلزپارٽي رڳو ٽن چئن ڏينهن ۾ ڏنا آهن.معصوم پريا ڪماري سالن کان اغوا آھي. اغوا ٿيل فضيلا سرڪي کي بہ ظاھر نٿو ڪيو وڃي. يونيورسٽين مان نياڻين جا لاش ملن ٿا. غريب ماڻهن جي زندگي جھنم بنائي وئي آهي. اياز لطيف پليجي چيو تہ سنڌ کي وڏيراشاهي، سرداري نظام، ڪرپشن، ڏوھن، بدامني لاقانونيت ۽ منشيات جو مرڪز بڻايو ويو آهي. پيپلزپارٽي جمھوريت جي نالي ۾ سنڌ ۾ آمريت قائم ڪري ڇڏي آهي. سڄي سنڌ پوليس ۽ ڏوهارين جي حوالي ڪري ڇڏي آهي. پيپلزپارٽي سنڌ کي ترقي بجاء لاشن جا تحفا ڏنا آهن. اياز لطيف پليجي چيو تہ سڄي سنڌ ڌاڙيلن، منشيات فروشن ۽ ڪرپٽ وزيرن ۽ بي رحم بي حس بيورو ڪريسي جي حوالي آھي. اياز لطيف پليجي چيو تہ سنڌ کي ڪرپشن جي ڪالوني بنايو ويو آھي. اقتدار جي مصلحت خاطر سنڌ کي بحرانن جي دلدل ۾ اڇلايو ويو آھي.اياز لطيف پليجي چيو تہ سنڌ پنھنجي تاريخ جي بدترين ٺڳن جي ور چڙهي وئي آهي، سنڌ جو پاڻي وڃي پيو ، سنڌ جون زمينون وڃن پيون ، سنڌ جو ميرٽ تباھ آهي ، سنڌ ۾ ڏوھ آهن ، بدامني آهي ۽ سنڌ جا ضلعا ڌاڙيلن جي حوالي آھن