راولپنڈی (ویب ڈیسک) پاکستان اور بنگلہ دیش کی فضائی افواج کے درمیان دفاعی تعاون کو مزید مضبوط بنانے پر اتفاق کیا گیا ہے۔
آئی ایس پی آر کی جانب سے جاری بیان کے مطابق بنگلہ دیش فضائیہ کے سربراہ حسن محمود خان کی ایئر ہیڈکوارٹرز اسلام آباد آمد پر انہیں گارڈ آف آنر پیش کیا گیا۔ ایئر چیف ظہیر احمد بابر سدھو نے ان کا استقبال کیا اور بنگلہ دیش فضائیہ کے لیے مشترکہ تربیتی تعاون کی یقین دہانی کرائی۔
آئی ایس پی آر کے مطابق سپر مشاق ٹرینر طیاروں کی تیز رفتار فراہمی اور طویل مدتی تعاون پر تبادلہ خیال کیا گیا، جبکہ بنگلہ دیش فضائیہ کے پرانے فلیٹ کی مینٹیننس اور ایئر ڈیفنس ریڈار سسٹمز پر بھی گفتگو ہوئی۔
پاک فوج کے ترجمان نے بتایا کہ جے ایف-17 تھنڈر طیاروں کی ممکنہ خریداری پر تفصیلی مشاورت کی گئی، جبکہ بنگلہ دیشی وفد نے نیشنل آئی ایس آر، سائبر کمانڈ اور ایرو اسپیس ٹیکنالوجی پارک کا دورہ بھی کیا۔
آئی ایس پی آر کے مطابق پاک-بنگلہ دیش دفاعی تعلقات کو طویل مدتی اسٹریٹجک شراکت داری میں تبدیل کرنے کے عزم کا اظہار کیا گیا۔
0 تبصرے