ڊي سي نوشهروفيروز جي صدارت هيٺ امن امان بابت اجلاس

اجلاس ۾ ايس ايس پي نوشهرو فيروز روحل خان کوسو ۽ ٻيا شريڪ ٿيا

نوشهرو فيروز (ڊ ر)ڊپٽي ڪمشنر نوشهرو فيروز محمد ارسلان سليم ضلعي ۾ امن امان برقرار رکڻ ۽ غير قانوني سرگرمين کي روڪڻ لاءِ پنهنجي آفيس ۾ هڪ اجلاس جي صدارت ڪئي. اجلاس ۾ ايس ايس پي نوشهرو فيروز روحل خان کوسو ۽ قانون لاڳو ڪندڙ ادارن، سيپڪو، سوشل ويلفيئر، چائلڊ پروٽيڪشن آفيسر، پوليس، ايڪسائيز اينڊ ٽيڪسيشن آفيسر ۽ ٻين لاڳاپيل آفيسرن شرڪت ڪئي. اجلاس کي خطاب ڪندي هن چيو ته ڪميٽي جي سڀني ميمبرن کي ضلعي ۾ غير قانوني سرگرمين کي روڪڻ ۽ قانون جي حڪمراني قائم ڪرڻ ۾ پنهنجو فعال ڪردار ادا ڪرڻ گهرجي. هن ضلعي ۾ قائم غير رجسٽرڊ مدرسن کي قانون مطابق رجسٽر ڪرڻ ۽ غير رجسٽرڊ مدرسن کي سيل ڪرڻ جا حڪم جاري ڪيا. هن چيو ته سڀني تعلقن جا اسسٽنٽ ڪمشنر، پوليس کاتي ۽ قانون لاڳو ڪندڙ ادارن جي عملدارن سان گڏ هڪ هفتي اندر غير رجسٽرڊ مدرسن جو دورو ڪن ۽ انهن کي قائل ڪن ته اهي پنهنجي مدرسن کي رجسٽر ڪن. هن ضلعي ۾ غير قانوني ۽ اسمگل ٿيل شين جي وڪري، خريداري ۽ نقل و حمل تي سختي سان ضابطو آڻڻ جي هدايت ڪئي. هن چيو ته منشيات خلاف ڪا به رعايت نه ڪئي وڃي ۽ پوليس طرفان اهڙن عنصرن خلاف سخت قانوني ڪارروائي ڪئي وڃي. ڊپٽي ڪمشنر سيپڪو عملدارن کي هدايت ڪئي ته بجلي چورن خلاف ڪارروائي ڪئي وڃي ته جيئن بجلي چوري کي روڪي سگهجي. هن بجلي چورن خلاف ڪيس داخل ڪرڻ جي هدايت ڪئي. اجلاس کي خطاب ڪندي ايس ايس پي نوشهروفيروز روحل خان کوسو چيو ته پوليس کاتو سڀني ادارن جي مدد لاءِ فورسز کي متحرڪ ڪندو ته جيئن منشيات، بجلي چوري ۽ غير قانوني پيٽرول پمپ ۽ پيٽرول ايجنسين خلاف ڪارروائي ڪري سگهجي. هن چيو ته پوليس کاتو ضلعي ۾ امن امان ۽ ٻين غير قانوني سرگرمين کي روڪڻ لاءِ ضلعي انتظاميا ۽ ٻين قانون لاڳو ڪندڙ ادارن سان گڏجي ڪم ڪندو. ان موقعي تي ڊپٽي ڪمشنر سوشل ويلفيئر کاتي ۽ ٻارن جي تحفظ واري کاتي جي آفيسرن کي هدايت ڪئي ته ضلعي ۾ ٻارن کان جبري پورهيو روڪڻ لاءِ پنهنجون ڪوششون تيز ڪن، ٻارن کان جبري پورهيو ڪرائڻ بابت عوام ۾ شعور پيدا ڪن ۽ عوام ۾ شعور پيدا ڪرڻ لاءِ هڪ وڊيو تيار ڪن، جيڪا سوشل ميڊيا ۽ اليڪٽرانڪ ميڊيا تي هلائي وڃي. ڊپٽي ڪمشنر چيو ته سڀني تعلقن جا اسسٽنٽ ڪمشنر ۽ ٻين ادارن سان گڏ غير قانوني پيٽرول پمپن کي سيل ڪن. ڊپٽي ڪمشنر ضلعي ۾ قومي شاهراهن جي خراب حالت تي ڳڻتي جو اظهار ڪيو. هن ضلعي ۾ گداگري ۽ غير قانوني قبضن خلاف آپريشن کي تيز ڪرڻ جا حڪم پڻ ڏنا.